ირაკლი კობახიძის განცხადებით, დავით გარეჯის საქმის პოლიტიზება მიუთითებს, რომ შესაძლოა, ამ საქმის უკან იმაზე მეტი იმალება, ვიდრე ერთი შეხედვით ჩანდეს

„დავით გარეჯის საქმის პოლიტიზება მიუთითებს, რომ შესაძლოა, ამ საქმის უკან იმაზე მეტი იმალებოდეს, ვიდრე ჩანს“, - „ქართული ოცნების“ საარჩევნო შტაბის უფროსის, ირაკლი კობახიძის განცხადებით, დავით გარეჯთან დაკავშირებული სავარაუდო დანაშაული „დაბალ დონეზე ვერ იქნება ჩადენილი“.

რა მოტივი შეიძლება ჰქონდეთ ამ საქმეზე დაკავებულებს, ირაკლი კობახიძე აცხადებს, რომ შესაძლებელია, მიზეზი ანგარება იყოს.

„ეს საეჭვო პოლიტიზება ამ საქმის, თავისთავად მიუთითებს იმაზე, რომ, როგორც ჩანს იმაზე მეტი იმალება, ვიდრე შეიძლება ერთი შეხედვით ჩანდეს. რა მოტივი ჰქონდა „ნაციონალურ მოძრაობას“, როდესაც შემოხაზა ე.წ. სამხრეთ ოსეთის ავტონომიური ოლქის საზღვრები, რამაც რუსეთს ფედერაციას გაუადვილა ოკუპაცია და ბორდერიზაცია, რომელიც დღემდე წარიმართება, რა მოტივაციაც ჰქონდათ, ალბათ, იგივე მოტივაცია აქვთ ახლაც. ეს არის გამოვლინება იმის, რომ არ უყვარდათ საკუთარი ქვეყანა, სხვა მოტივაციას ვერ ვხედავ და შესაძლოა, მხედველობაში მივიღოთ ანგარების მოტივი“, - განაცხადა ირაკლი კობახიძემ.

ჟურნალისტის შესაბამისი შეკითვის საპასუხოდ ირაკლი კობახიძემ განაცხადა, ლოგიკურია ექსპერტების ეჭვი, რომ „ნაციონალურ მოძრაობას“ ეშინია, დავით გარეჯის საქმეზე დაკავებულები არ ალაპარაკდნენ.

„ეს ეჭვი, ბუნებრივია, ლოგიკურია, გამომდინარე იქიდან, რომ ასეთი სავარაუდო დანაშაული დაბალ დონეზე ვერ იქნება ჩადენილი, ამიტომ ამ ეჭვს თავისი საფუძველი აქვს, თუმცა ეს არის ეჭვი და ჩვენთვის მთავარია, დაველოდოთ სამართალდამცველებს. ჩვენთვის მთავარია ამ საკითხის მოგვარება ჩვენს აზერბაიჯანელ მეგობრებთან ერთად“, - განაცხადა ირაკლი კობახიძემ.

ივერი მელაშვილსა და ნატალია ილიჩოვას აღკვეთის ღონისძიების სახით პატიმრობა 8 ოქტომბერს შეეფარდათ.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.