დავით ხიდაშელი: საქართველოში ყველა რუკა უცნაურად ქრებოდა, ამიტომ 12 ეგზემპლარი გავაკეთე და ყველა უწყებას გადავეცი, მათ შორის ბიძინა ივანიშვილს

ბიზნესმენმა დავით ხიდაშელმა, რომელმაც საქართველოს 1938 წლის რუკის დედანი დაუბრუნა, "რუსთავი2"-ის ეთერში განაცხადა, რომ მან აღმოჩენილი რუკების 12 ეგზემპლარი გააკეთა და სხვადასხვა უწყებას გაუგზავნა. მისივე თქმით, ამ საკითხზე ჩვენება მან პროკურატურასაც მისცა.

"ეს საბუთები ავიღე, მიაგდეს ეს ორიგინალი რუკები დამამტკიცებელ საბუთად ამ ანალიტიკურ საბუთზე ჩამოვიტანე და გადავეცი თავდაცვის სამინისტროს. ვთხოვე გაეკეთებინათ 12 ასლი, ვინაიდან ამ საბუთების ქექვაში დავადგინეთ, რომ საქართველოში რუკები რაღაცნაირად, ვირტუალურად ქრება და ვერ პოულობენ.

მომიწია 12 ეგზემპლარის გაკეთება და აგვისტოდან დავიწყე, ვთხოვე თავდაცვის სამინისტროსაც, რომ მოდი, რომ არ დაიკარგოს ეს რუკები, ყველა სხვადასხვა ორგანოს გადავცეთ. გადავეცი საგარეო საქმეთა სამინისტროს, შევხვდი და გადავეცი საქართველოს პრეზიდენტს, პრემიერ ბატონ გახარიას, გადავეცი უშიშროების სამინისტროს, შინაგან საქმეთა სამინისტროს, ყველას და ერთი ეგზემპლარი ბატონ ბიძინას - აგერ ბატონო, რომ მთხოვე, ყველაფერი ვიპოვე, ამოვქექე და გადმოგცემთ ამ რუკას და თავად გაარკვიეთ საქართველო -აზერბაიჯანის მომავალი საზღვრის საკითხი, გაქვთ ყველა საბუთი, მოვიძიე ყველა სხვადასხვა რუკა, გადმოგეცით და მიხედეთ თქვენ საქმეს და გაარკვიეთ საზღვარი.

ვინაიდან თავდაცვის სამინისტროს ეჭვი შეეპარა და შეხედეს, რომ დიდი განსხვავებებია, ამ საქმის ასე შენახვა არ შეიძლებოდა და გადასცა პროკურატურას, რათა გაერკვია თუ რამე დანაშაული იყო. მე ვთქვი, რომ ეს ჩემი საქმე არ არის, მე გადმოგეცით, მე გამათავისუფლეთ. მითხრეს, რომ მობრძანდი პროკურატურაში და დაწერე ახსნა-განმარტება, როგორ ჩამოიტანე და რა ჩამოიტანეო. მივეცი ჩვენება პროკურატურას და ყველაფერი დეტალურად აღვწერე, რაც ახლა მოგიყევით", -განაცხადა დავით ხიდაშელმა.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.