კახა კახიშვილი: დავით გარეჯის საქმეზე ბრალეულობის გამოკვეთის შემთხვევაში, ყველა მოქმედმა ან ყოფილმა თანამდებობის პირმა პასუხი უნდა აგოს

დავით გარეჯის საქმე არის მნიშვნელოვანი და რეზონანსული, რთულად მახსენდება ასეთი მნიშვნელობის საქმე ბოლო პერიოდში. საქმე დეტალურად არ ვიცი, თუმცა ის საჯარო განცხადებები, რაც კეთდება აქედან იკვეთება დანაშაულის კონკრეტული ნიშნები, - ამის შესახებ ტელეკომპანია იმედის გადაცემა „დღის ქრონიკაში“ისნის მაჟორიტარულ ოლქში „ქართული ოცნების“მაჟორიტარობის კანდიდატმა კახა კახიშვილმა განაცხადა.

მისი თქმით, გაუგებარია იმ ადამიანების პოზიცია, რომლებიც ცალსახად აცხადებენ, რომ დავით გარეჯის საქმე არ უნდა გამოიძიონ. „თითოეული ჩვენგანის ვალია ეს საქმე გამოვიძიოთ და ჭეშმარიტება დავადგინოთ. შეიძლება ვიღაცას ეგონოს რომ დანაშაულის ნიშნები არაა, ან პირიქით მიიჩნევდეს, რომ აქ დანაშაულია ჩადენილი. აქ ყველას მიზანი უნდა იყოს ერთი, ჭეშმარიტების დადგენა. ამიტომ ჩემთვის გაუგებარია ზოგიერთი პოლიტიკოსის განცხადება, რომ მოდით ამ საქმეს თავი დავანებოთ“, - აღნიშნა კახიშვილმა.

დეპუტატობის კანდიდატი მიიჩნევს, რომ დავით გარეჯის საქმე, მორალურადაც მძიმეა. „თუ გამოიკვეთება რომელიმე პირის, საქართველოს მოქალაქის ბრალეულობა ამ საქმეში და დადასტურდება სასამართლოს განაჩენით, ეს მისთვის კი არა, მისი ოჯახისთვისაც საზიანო იქნება. რადგან ჩვენი მიწა-წყალი რაღაცის საფუძველზე გადაეცა სხვა სახელმწიფოს“, - აღნიშნა კახიშვილმა.

თუმცა კახიშვილი აცხადებს, რომ როგორც იურისტი ვერავის ბრალეულობაზე ვერ ისაუბრებს, ვიდრე არ იქნება სასამართლოს გადაწყვეტილება. „საქმე უნდა გამოიძიონ თავიდან-ბოლომდე და ნებისმიერი მოქმედი ან ყოფილი თანამდებობის პირის პასუხისმგებლობა უნდა დადგეს, თუ ამ საქმეში მისი ბრალეულობა გამოიკვეთა“, - აღნიშნა კახიშვილმა.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა.

ივერი მელაშვილსა და ნატალია ილიჩოვას აღკვეთის ღონისძიების სახით პატიმრობა 8 ოქტომბერს შეეფარდათ.