ელჩი დავით სოლომონია: საქართველო სარგებლობს სტაბილური და უაღრესად წარმატებული რეიტინგებით, რომლებიც საერთაშორისო ინსტიტუტების და სარეიტინგო სააგენტოების მიერ არის აღიარებული

რა ხდის საქართველოს ერთ-ერთ უდიდეს კულტურულ მემკვიდრეობად თანამედროვე მსოფლიოში? ამ კითხვაზე პასუხის მისაღებად Casamundi Cultura საქართველოს ელჩს ბრაზილიაში, დავით სოლომონიას ესაუბრა, რომელიც ბრაზილიაში 2017 წლის ივლისიდან იმყოფება.

ჟურნალისტი ინტერვიუში აღნიშნავს, რომ ერთი თვის წინ, საქართველოში მაუწყებლობა დაიწყო Euronews Georgia-მ, რაც ელჩის აზრით, კიდევ ერთხელ ცხადჰყოფს, რომ საქართველო რეგიონული ლიდერია მედიის პლურალიზმისა და სიტყვის თავისუფლების, დამოუკიდებელი ახალი ამბების წარმოებისა და ევროპულ სტანდარტებთან შესაბამისობის თვალსაზრისით.

„ეს ნიშნავს, რომ გვექნება უფრო მიუკერძოებელი და ობიექტური ინფორმაცია და ნაკლები „ყალბი ამბები“ (fake news). იმედი მაქვს, რომ Euronews Georgia ისარგებლებს Euronews–ის ბრენდითა და რეპუტაციით, ხოლო თავად Euronews-ი სარგებელს მიიღებს ადგილობრივი ჟურნალისტების გუნდის მიერ წარმოებული მასალებით, განსაკუთრებით ისეთ რეგიონში, როგორშიც ჩვენ ვცხოვრობთ“, - განაცხადა ელჩმა.

ინტერვიუ განათლების საკითხზე საუბრით გრძელდება. „განათლება ყოველთვის იყო ქართული საზოგადოების ხერხემალი და დღემდე ითვლება ერთ-ერთ უძლიერესად. ჩვენ ყოველთვის გვქონდა მაღალი სტანდარტები და მოლოდინები განათლებასთან დაკავშირებით, რადგან გვესმის, რომ გლობალურ ეკონომიკაში საქართველოს კონკურენციის პერსპექტივები დიდწილად იქნება დამოკიდებული მაღალკვალიფიციურ სამუშაო ძალაზე, რომელიც სწავლის საშუალებით უნდა შეიქმნას“, - აცხადებს სოლომონია.

სტატიაში საუბარი ასევე ეხება მსოფლიო ბანკის კვლევაზე დაფუძნებულ მთავრობის სტრატეგიას „სოციალურ ეკონომიკური განვითარება 2020“, რომელშიც განისაზღვრა რეკომენდაციები მომავლისათვის.

ელჩმა ასევე ხაზი გაუსვა იმას, რომ საქართველო სრულად არის ჰარმონიზებული „ბოლონიის პროცესთან“ და ფაქტს, რომ საქართველო სარგებლობს სტაბილური და უაღრესად წარმატებული რეიტინგებით, რომლებიც აღიარებულია საერთაშორისო ინსტიტუტების და სარეიტინგო სააგენტოების მიერ.

როგორც სტატიაშია ნათქვამი, კულტურის მხრივ ქვეყანა მდიდარი და მრავალფეროვანია და მისი კულტურა ათასწლეულებით თარიღდება.

„ქართული თანამედროვე კულტურა წარმოადგენს ძველისა და თანამედროვეს ფანტასტიკურ კომბინაციას. ბოლო წლების განმავლობაში მიღწეულმა პროგრესმა საერთაშორისო ინტერესი გააღვიძა საქართველოს და მისი კულტურის მიმართ”, - განმარტავს სოლომონია.

„ჩვენ გვაქვს მონუმენტური ქართული არქიტექტურა, მსოფლიოში ცნობილი მრავალხმიანი სიმღერა, მდიდარი საერო ლიტერატურა, ხალხური ცეკვები და ბალეტი, თეატრი და კინო, მინანქარი და ფერწერა, ეს ყველაფერი ჩვენი წინაპრების გამორჩეულ თვისებებს ატარებს“, - განაცხადა ელჩმა.

სოლომონიას განმარტებით, პირველი სახელი, რომელიც ყველას ახსენდება კულტურაზე საუბრისას არის შოთა რუსთაველი, ეპიკური პოემის „ვეფხისტყაოსნის” ავტორი, რომელიც დაწერილია XII საუკუნეში, პერიოდში და ცნობილია როგორც ქართული სახელმწიფოს „რენესანსი“. ის ასევე ახსენებს თანამედროვე ბალეტის ერთ-ერთ დამაარსებელს გიორგი ბალანჩივაძეს (ბალანჩინი) და ცნობილ მხატვრებს, როგორებიცაა ნიკო ფიროსმანი, ლადო გუდიაშვილი და ელენე ახვლედიანი.

როგორც განცხადებაშია ნათქვამი, როგორც ყველა ერს, საქართველოსაც აქვს პრობლემები.

„2008 წლის აგვისტოში რუსეთმა დაარღვია საერთაშორისო სამართალი და დაიწყო მასშტაბური სამხედრო მოქმედებები საქართველოს წინააღმდეგ, რაც დასრულდა საქართველოს ორი რეგიონის ოკუპაციით. დღეს აფხაზეთისა და ცხინვალის რეგიონებში მშვიდობიანი ადგილობრივი მოსახლეობა მუდმივად არის გატაცებებისა და უკანონო დაკავებების (და არა მარტო) მსხვერპლი. ხშირია დევნილთა წამებისა და მკვლელობის შემთხვევები, დავით ბაშარულის, გიგა ოთხოზორიას და არჩილ ტატუნაშვილის, ასევე ირაკლი კვარაცხელიას გარდაცვალება ოკუპირებულ რეგიონებში გვახსენებს ოკუპაციის რეალურ სახეს.

სამწუხაროდ, არ არსებობს ადამიანის უფლებათა დაცვის საერთაშორისო მექანიზმები, რომლებსაც ექნებოდათ ოკუპირებულ ტერიტორიებზე შეუზღუდავი დაშვება. საქართველოს მთავრობა არ იშურებს დიპლომატიურ ძალისხმევას და განაგრძობს 2008 წლის 12 აგვისტოს ცეცხლის შეწყვეტის პირობების დაცვას. აღსანიშნავია, რომ კოვიდ-19 პანდემიის დაწყების პირველივე დღეებიდან საქართველომ გამოთქვა მზადყოფნა, უზრუნველყოს სრული მხარდაჭერა საოკუპაციო ხაზის მეორე მხარეს მცხოვრებ მოსახლეობისთვის.

კონფლიქტის შედეგად დაზარალებული ადამიანებმა, განსაკუთრებით მათ, ვინც ოკუპირებულ რეგიონებში ცხოვრობენ, უნდა იცოდნენ, რომ საქართველოს მთავრობა მზადაა, პოზიტიური ცვლილებები შეიტანოს მათ ცხოვრებაში. ასევე ხაზგასმით მინდა აღვნიშნო, რომ აფხაზეთი და სამხრეთ ოსეთი არ არიან მხოლოდ ადგილობრივი პრობლემა, არამედ ისინი „შავი ხვრელია“ რეგიონული და ევროპული უსაფრთხოებისათვის“, - დასძინა ელჩმა.

საუბრის შემდგომი თემა ქვეყანაში აქტუალურ კიდევ ერთ საკითხს, საარჩევნო რეფორმას უკავშირდება.

„საქართველოსთვის საკონსტიტუციო რეფორმა საარჩევნო სისტემასთან დაკავშირებით მართლაც ისტორიული მნიშვნელობისაა. შედეგად, ჩვენ საპარლამენტო მმართველობაზე გადავედით 2020 წლიდან და 2024 წლისთვის დაგეგმილი საპარლამენტო არჩევნები ჩატარდება სრულად პროპორციული საარჩევნო სისტემით, რაც დიდი ნაბიჯია წინ და ჩვენს ქვეყანას უფრო წინ წაიყვანს დემოკრატიული განვითარების გზაზე“, - განმარტავს ელჩი.

როგორც განცხადებაში წერია, საუბარი გრძელდება ბრაზილია-საქართველოს ურთიერთობებზე. საქართველოში რამდენიმე ბრაზილიელი ცხოვრობს და მუშაობს, ასევე არიან ქართველებიც ბრაზილიაში. ვიზებისგან გათავისუფლებამ ხელი შეუწყო ორ ხალხს შორის ურთიერთობების განვითარებას, რის შედეგადაც ყოველწლიურად იზრდება ვიზიტორთა რაოდენობა.

„ბრაზილიელების ვიზიტის მრავალი მიზეზი არსებობს საქართველოში, უძველესი კულტურის, მდიდარი ისტორიის, ტრადიციების ქვეყანაში. საქართველო არის ღვინის აკვანი. დადასტურებული ფაქტია, რომ საქართველოში აღმოჩენილია უძველესი ღვინო, რომელიც დაახლოებით 8 ათასზე მეტი წლისაა. ქართული ღვინოები გამოირჩევა ყველანაირი ფერითა და არომატით, რომელსაც კიდევ მეტ ხიბლს სძენს ქართული სამზარეულო - მდიდარი, მრავალფეროვანი, უნიკალური, როგორც საქართველოს პეიზაჟი, ჩვენი სამზარეულო სტუმრებს სთავაზობს უამრავ არჩევანს და ახალ შეგრძნებას. საქართველო არის ასევე პირველი ევროპელის, „დმანისელი ჰომინიდის“ სამშობლო, რომელიც აღმოაჩინეს საქართველოში, დმანისში არქეოლოგიური გათხრების დროს. ნაპოვნი თავის ქალა 1,7 მილიონი წლის ხნისაა, რაც თითქმის 1 მილიონი წლით მეტია ნებისმიერ სხვა ევროპულ ადგილას ნაპოვნ ადამიანის წინაპრებთან შედარებით. საქართველო ეს ასევე არის კოლხეთის სამეფო, ქვეყანა სადაც არგონავტები გაემგზავრნენ ოქროს საწმისის მოსაპოვებლად.

როგორც ინტერვიუშია ნათქვამი, საქართველო ერთ-ერთი უძველესი ქრისტიანული ქვეყანაა, რომელმაც ქრისტიანობა ოფიციალურ რელიგიად მიიღო ჩვ. წ. IV საუკუნეში. საქართველოში ასევე მდებარეობს ევროპაში ორი უმაღლესი დასახლებული პუნქტი, ერთია უშგული, რომელიც UNESCO–ს მიერ მსოფლიო მემკვიდრეობის ძეგლად არის აღიარებული, ზემო სვანეთში, ზღვის დონიდან 2,200 მეტრზე, ხოლო მეორე ბოჭორნა, თუშეთში, 2,345 მ სიმაღლეზე.

„შედარებით მცირე ზომის მიუხედავად, ქვეყანას აქვს ოთხი სეზონი და ყველა სახის კლიმატური ზონა, მათ შორის სათხილამურო კურორტები, შავი ზღვის სანაპირო, ალპური და სუბტროპიკული კურორტები, განვითარებული ტურისტული ინფრასტრუქტურით. საქართველო ნამდვილი სამოთხეა ლაშქრობისა და ბანაკის მოყვარულთათვის ან მათთვის, ვინც უბრალოდ დატკბება კავკასიონის მთების ხედით. ქართული კულტურა მსოფლიოში ცნობილია სტუმართმოყვარობით და ტოლერანტობით. ჩვენ სტუმრებს ღვთის საჩუქრად მივიჩნევთ“ - აღნიშნა საუბრის დასასრულს ელჩმა.