კახა კალაძე: დავით სერგეენკოს სახელს ჩვენი ხელისუფლების ერთ-ერთი მთავარი მონაპოვარი - ჯანდაცვის ფუნდამენტური რეფორმის დაწყება უკავშირდება

მე არ დავიწყებ წარმატებულ რეფორმებზე საუბარს და იმ პროექტების ჩამოთვლას, რომლებიც დავით სერგეენკოს უშუალო ჩართულობითა და მონაწილეობით განხორციელდა და ამისთვის მხოლოდ ერთი, საყოველთაო ჯანდაცვის პროგრამის ხსენებაც საკმარისია. ამ ადამიანს არაერთი გადარჩენილი სიცოცხლე და ჩვენი ხელისუფლების ერთ-ერთი მთავარი მონაპოვარი - ჯანდაცვის ფუნდამენტური რეფორმის დაწყება უკავშირდება, - ამის შესახებ „ქართული ოცნების“ საბურთალოს მაჟორიტარობის კანდიდატის, დავით სერგეენკოს მოსახლეობისთვის წარდგენაზე თბილისის მერმა, „ქართული ოცნების“ გენერალურმა მდივანმა, კახა კალაძემ განაცხადა.

„ვაგრძელებთ საარჩევნო კამპანიას, ვემზადებით არჩევნებისთვის, სადაც ჩვენი ქვეყნის მოსახლეობამ უნდა გადაწყვიტოს, გააგრძელებს თუ არა ჩვენი ქვეყანა მშვიდობიან, დემოკრატიულ განვითარებას, რომლის მიზანიც ერთიანი, ეკონომიკურად ძლიერი სახელმწიფოს ჩამოყალიბებაა. სახელმწიფოსი, სადაც ადამიანის უფლებები უმაღლეს დონეზეა დაცული და ადამიანზე ზრუნვა მთავარი ამოსავალი წერტილი და მთავარი ღირებულებაა. აღარ დავიწყებ წარმატებულ რეფორმებზე საუბარს და იმ პროექტების ჩამოთვლას, რომლებიც დავით სერგეენკოს უშუალო ჩართულობითა და მონაწილეობით განხორციელდა და ამისთვის მხოლოდ ერთი, საყოველთაო ჯანდაცვის პროგრამის ხსენებაც საკმარისია. ამ ადამიანს არაერთი გადარჩენილი სიცოცხლე და ჩვენი ხელისუფლების ერთ-ერთი მთავარი მონაპოვარი - ჯანდაცვის ფუნდამენტური რეფორმის დაწყება უკავშირდება. დავით სერგეენკოს მინისტრობის პერიოდში შეიცვალა დარგის ფილოსოფია, მიდგომები და დამოკიდებულება. ჯანდაცვა პრივილეგიის ნაცვლად სახელმწიფოს პრიორიტეტი გახდა. წარსულს ჩაბარდა ის საშინელი დრო, როდესაც გადაუდებელი ჯანდაცვის სერვისებისთვის ადამიანებს უწევდათ სახლის გაყიდვა და უკანასკნელი თეთრის გაღება. ჩვენ ეს ყველაფერი წარსულს ერთიანი შრომით ჩავაბარეთ. მე, როგორც ქალაქის მერს, არ მაქვს უფლება, არ ვისაუბრო იმ მნიშვნელოვან პროექტებზე, რომლებიც ჩვენ ბოლო წლების განმავლობაში მთელი ქალაქის მასშტაბით განვახორციელეთ.

რა თქმა უნდა, პირობა მივეცით თბილისელებს, რომ დედაქალაქში ცხოვრება შეიცვლებოდა - მოწესრიგდებოდა ინფრასტრუქტურა, განახლდებოდა სკვერები, მოწესრიგდებოდა საზოგადოებრივი ტრანსპორტი. ყველა ამ მიმართულებით ჩვენ უკვე კონკრეტული ნაბიჯები გადავდგით. დავიწყეთ საზოგადოებრივი ტრანსპორტის განახლება, ქუჩებისა და მიწისქვეშა კომუნიკაციების მოწესრიგება, სკვერებისა და პარკების გალამაზება და ეს მიდგომა გაგრძელდება. 2014 წელს საბურთალოს რაიონის ბიუჯეტი იყო დაახლოებით 11 მილიონი ლარი, 2020 წელს კი ორჯერ არის გაზრდილი და 22 მილიონს შეადგენს. ეს ნიშნავს იმას, რომ უფრო მეტი პროექტის განხორციელება და კარგი საქმის კეთება შეგვიძლია.

დღევანდელი ჩვენი შეხვედრა იმართება ყოფილი იპოდრომის ტერიტორიაზე და მინდა ვისაუბრო იმ მნიშვნელოვან პროექტზე, რომელსაც არა მხოლოდ საბურთალო, არამედ მთელი ქალაქი ელოდება. ეს არის ცენტრალური პარკი, რომელსაც ბიძინა ივანიშვილის ოჯახი და ფონდი „ქართუ“ აკეთებს. სამუშაოები დაწყებულია, რომელიც 2 წელიწადში დასრულდება და ქალაქს ექნება კიდევ ერთი უზარმაზარი რეკრეაციული ზონა, სადაც ყველა თაობის ადამიანს ექნება თავისი კუთხე, თავისი ადგილი, სადაც იქნება ყველანაირი შესაძლებლობა დასვენების, გართობის, განტვირთვის. ძალიან მიხარია, როგორც ქალაქის მერს, როგორც, უბრალოდ, ამ ქალაქში მცხოვრებ ადამიანს, რომ ასეთი მნიშვნელოვანი პროექტი განხორციელდება.

მინდა ყველას წარმატება და გამარჯვება გისურვოთ. დარწმუნებული ვარ, ორ დღეში, ამ მნიშვნელოვანი არჩევნების შემდეგ, ჩვენ ყველა ერთად ვიზეიმებთ გამარჯვებას და არ იფიქროს ვინმემ, რომ ეს მხოლოდ ჩვენი კანდიდატის, ჩვენი პარტიული გამარჯვება იქნება. ეს არის ჩვენი სამშობლოს გამარჯვება, რადგან დღეს, როგორც არასდროს, ისე სჭირდება ჩვენს ქვეყანას მშვიდობა, სტაბილურობა და განვითარება. ერთადერთი პოლიტიკური ძალა, რომელსაც ამის გაკეთება შეუძლია, რომელსაც აქვს რეალური ხედვა, როგორ განვითარდეს ეს ქვეყანა, როგორ წავიდეს წინ, როგორ გავაძლიეროთ ეკონომიკა, როგორ დავეხმაროთ ერთმანეთს, როგორ შევუწყოთ გაჭირვებაში მყოფ ადამიანებს ხელი და გავუმაგროთ ზურგი, ამის რესურსი გააჩნია პოლიტიკურ გუნდს, პარტიას „ქართული ოცნება - დემოკრატიული საქართველო“.

დარწმუნებული ვარ, 31-ში ჩვენ ერთად ვიზეიმებთ ამ გამარჯვებას. მინდა გამარჯვებები გისურვოთ, წარმატებები გისურვოთ ყოველდღიურ ცხოვრებაში. ერთად საქართველოს წარმატებისთვის!“ - განაცხადა კალაძემ.