თსუ ევროპის 400 საუკეთესო უნივერსიტეტს შორისაა

Times Higher Education-ის ევროპის 400 საუკეთესო უნივერსიტეტის ჩამონათვალში ივანე ჯავახიშვილის სახელობის თბილისის სახელმწიფო უნივერსიტეტმა 301+ პოზიცია დაიკავა. 2017 წლის რანჟირებაში სულ 35 ევროპული ქვეყანა მოხვდა. თსუ კავკასიის რეგიონიდან ერთადერთია. ევროპის უნივერსიტეტები მსოფლიოს 1 000 საუკეთესო უნივერსიტეტის 40 %-ს შეადგენენ. სიაში კვლავ ოქსფორდის უნივერსიტეტი ლიდერობს. მასთან ერთად ჩამონათვალში გაერთიანებული სამეფოს 90 უნივერსიტეტია. უნივერსიტეტების რაოდენობით მე-2 ადგილს გერმანია იკავებს - 41 უნივერსიტეტით, რომელთა უმეტესობა 100 საუკეთესო უნივერსიტეტს შორისაა.

2016 წელს თსუ მსოფლიოს საუკეთესო უნივერსიტეტების ჩამონათვალში მოხვდა - 980 უნივერსიტეტს შორის 801+ პოზიცია დაიკავა.

თსუ-მ ყველაზე დიდი შეფასება საერთაშორისო ცნობადობის და ინდუსტრიული შემოსავლის კომპონენტში აიღო. საერთაშორისო ცნობადობა გულისხმობს საერთაშორისო და ადგილობრივი სტუდენტების და პერსონალის რაოდენობების შეფარდებას, საერთაშორისო თანამშრომლობას. ინდუსტრიული შემოსავალი გულისხმობს გამოგონებების და ინოვაციების წარმოებაში დანერგვას ქვეყნის მასშტაბით.

Times Higher Education-მა შესაფასებლად გამოიყენა უნივერსიტეტების გამოცემების რაოდენობაც, პუბლიკაციები, რომლებიც Elsevier Scopus-ის ბაზაში იძებნება.

შეფასების 5 კრიტერიუმია: სწავლება (სასწავლო გარემო) 30 %; კვლევა (რაოდენობა, შემოსავალი და რეპუტაცია ) 30 %; ციტირება (კვლევის გავლენა) 30 %; საერთაშორისო ცნობადობა (პერსონალი, სტუდენტები და კვლევა) 7,5 %; ინდუსტრიული შემოსავალი (გამოგონებებისა და ინოვაციების წარმოებაში დანერგვა) 2,5 %.

შეფასებისას დიდი მნიშვნელობა ენიჭება უნივერსიტეტის საერთაშორისო რეპუტაციას, თანამშრომლების და სტუდენტების რაოდენობრივ შეფარდებას, სამეცნიერო კვლევების პროდუქტიულობას, რეფერირებად ჟურნალებში კვლევების გამოქვეყნებას, ციტირების ინდექსს და სხვ.

ინფორმაციას ipn-ი ავრცელებს.