მიქაელ ბოტკოველი: თორნიკე მამალაძის განცხადებები მეუფეებზე მისი ინტერპრეტაციაა

საპატრიარქო ბრალდებული დეკანოზის ოჯახთან შეხვედრას პოზიტიურად აფასებს. პატრიარქის მდივანი მამა მიქაელ ბოტკოველი დეკანოზის ძმის თორნიკე მამალაძის განცხადებას ეხმაურება, რომელიც მამა დავით ჭინჭარაულის მიმართ ბრალდებას ეხებოდა. "მამა დავითი ჭინჭარაული ესწრებოდა შეხვედრას, მამალაძის ოჯახს ჰქონდათ ასეთი შეკითხვა, რატომ არ შედიან სასულიერო პირები გიორგი მამალაძესთან მოსანახულებლად. მამა დავითს ორჯერ თუ სამჯერ მოუწია გამეორება იმის გამეორება, რომ ის და მამა კახაბერი უახლოეს დღეებში შეძლებენ და მოინახულებენ მამა გიორგის. ეს იყო მამა დავით ჭინჭარაულის შეხვედრაში მონაწილეობის მიზეზი,"- განაცხადა მიქაელ ბოტკოველმა. 

მისივე თქმით, შეხვედრას ესწრებოდა ასევე პატრიარქის ქორეპისკოპოსი მეუფე იაკობი, რომელსაც არაფერი არ უთქვამს. "რატომღაც თორნეკე მამალაძე მასაც ახსენებდა, თითქოს მეუფე იაკობი ერეოდა საუბარში. მოკლედ უნდა შევეგუოთ, რომ ერთი და იგივე ფაქტის და მოვლენის მომსწრე ბევრი ადამიანი სხვადასხვაგვარად გამოიტანს ინფორმაციას. ეს მათი ინტერპრეტაციაა. სწორედ ამიტომაც ხდებოდა ჩაწერა და თუ აუცილებლობა იქნება, ჩვენ სრულ ქრონომეტრაჟს გამოვაქვეყნებთ," - განაცხადა მამა მიქაელ ბოტკოველმა.

დღეს პატრიარქთან გამართული შეხვედრის შემდეგ, დეკანოზ გიორგი მამალაძის ძმამ განაცხადა,რომ საუბარს აწყვეტინებდნენ მამა დავითი (ჭინჭარაული), მეუფე თეოდორე, მეუფე იაკობი, მეუფე ანდრია, მამა კახაბერი (გოგოტიშვილი). 

შეხვედრის შემდეგ თორნიკე მამალაძის ბრალდება უარყო ასევე არქიმანდრიტმა დავითმა. "კითხვები არ მქონია. ერთადერთი შემთხვევა იყო, როდესაც საუბარი მამა გიორგის მონახულებას შეეხო, როდესაც ძმამ ზიარებაზე იკითხა. ვუთხარი, რომ პატრიარქმა მონახულება უკვე დაგვავალა".

დეკანოზს საქმის განხილვა თბილისის საქალაქო სასამართლოში 23 ივნისს განახლდება.

დეკანოზი გიორგი (მამალაძე) მკვლელობის მომზადების ბრალდებით თბილისის საერთაშორისო აეროპორტში 10 თებერვალს დააკავეს. ის ბერლინში პატრიარქთან მიფრინავდა. ილია მეორეს HELIOS Klinikum Berlin-Buch-ში ოპერაციისთვის ამზადებდნენ. ჟურნალისტმა ირაკლი მამალაძემ პროკურატურას აცნობა, რომ მამა გიორგიმ ციანიდის მოძიებაში დახმარება სთხოვა, რითაც მაღალი იერარქიის სასულიერო პირი უნდა მოეწამლა.