ევროპის საბჭოს საპარლამენტო ასამბლეის დელეგაციის ხელმძღვანელი: საქართველომ აჩვენა ევროსაბჭოს სხვა 46 წევრ ქვეყანას, რომ არჩევნების გამართვა შესაძლებელია პანდემიის პერიოდშიც კი

ის, რომ საქართველომ მოახერხა არჩევნების ორგანიზება ასეთ გარემოში, მიუთითებს იმაზე, რომ თქვენ დემოკრატიის არ გეშინიათ. მოვუწოდებთ ახალ პარლამენტს, რომ რაც შეიძლება მალე შეიკრიბონ და დაიწყონ მოქმედება, რათა გააუმჯობესონ საკანონმდებლო ჩარჩო კამპანიების ზედამხედველობის მიმართულებით. დარწმუნებული ვარ, რომ საჭირო ნაბიჯები გადაიდგმება, თუკი ამისთვის საჭირო პოლიტიკური ნება იარსებებს, - ამის შესახებ ევროპის საბჭოს საპარლამენტო ასამბლეის დელეგაციის ხელმძღვანელმა, ნიდერლანდელმა დეპუტატმა, ტინი კოქსმა განაცხადა.

„მადლობას ვუხდი ყველა იმ მამაც ქართველ ამომრჩეველს, რომელმაც არჩევნებში მიიღო მონაწილეობა, მიუხედავად იმისა, რომ არსებობდა კორონავირუსის რისკი. ის, რომ საქართველომ მოახერხა არჩევნების ორგანიზება ასეთ გარემოში, მიუთითებს იმაზე, რომ თქვენ დემოკრატიის არ გეშინიათ. ამ არჩევნების გამართვით საქართველო აჩვენებს ევროსაბჭოს სხვა 46 წევრ ქვეყანას, რომ არჩევნების გამართვა შესაძლებელია პანდემიის პერიოდშიც კი. სწორედ ამ კრიზისის პერიოდში არ შეიძლება, რომ გქონდეს ნაკლები დემოკრატია და სწორედ ამას აჩვენებს პანდემიის პერიოდში არჩევნების ორგანიზება. პირიქით, ახლა საჭიროა მეტი დემოკრატია. ზოგადად, საპარლამენტო არჩევნები თავისუფალი იყო, მაგრამ ევროსაბჭოს საპარლამენტო ასამბლეა გამოხატავს სინანულს, რომ საქართველოში მაინც არ არის კარგად წარმოდგენილი ნათელი წესები კამპანიის დაფინანსების კუთხით. ეს უარყოფით ზეგავლენას ახდენს არჩევნებზე და ცუდ სიგნალს აძლევს მოქალაქეებს. შესაბამისად, მოვუწოდებთ ახალ პარლამენტს, რომ რაც შეიძლება მალე შეიკრიბონ და დაიწყონ მოქმედება, რათა გააუმჯობესონ საკანონმდებლო ჩარჩო კამპანიების ზედამხედველობის მიმართულებით. დარწმუნებული ვარ, რომ საჭირო ნაბიჯები იქნება გადადგმული, თუკი ამისთვის საჭირო პოლიტიკური ნება იარსებებს. საქართველო დიდი ხანია, ევროსაბჭოს წევრია და მას ნებაყოფლობით აქვს აღებული ვალდებულება, რომ დაიცვას კანონის უზენაესობა, ადამიანის უფლებები და დემოკრატია. შესაბამისად, ვიმედოვნებთ, რომ ჩვენი რეკომენდაციები გათვალისწინებული იქნება ყველა პოლიტიკური პარტიის მიერ, რაც გააძლიერებს საქართველოს დემოკრატიას“, - განაცხადა ტინი კოქსმა.

31 ოქტომბერს ჩატარებული არჩევნების შედეგების ეტაპობრივ განახლებას თვალი შეგიძლიათ ადევნოთ ამ ბმულზე.