არჩილ თალაკვაძე: საერთაშორისო სადამკვირვებლო მისიების შეფასება გაცილებით პოზიტიურია, ვიდრე წინა არჩევნებთან დაკავშირებულ დასკვნებში მოცემული შეფასებები

საერთაშორისო სადამკვირვებლო მისიების შემაჯამებელი ანგარიშის თანახმად, 31 ოქტომბრის არჩევნები შეფასდა, როგორც კონკურენტული არჩევნები, რომელშიც დაცული იყო ყველა ფუნდამენტური უფლება. ნათქვამია, რომ COVID-19-ის პანდემიის მიუხედავად, საქართველომ შეძლო, თავისუფალი და დემოკრატიული არჩევნების ჩატარება, - ამის შესახებ პარლამენტის თავმჯდომარემ, არჩილ თალაკვაძემ „ქართული ოცნების“ ოფისში გამართულ ბრიფინგზე განაცხადა.

„ეს გახლავთ საერთაშორისო საზოგადოების მიერ საქართველოს საპარლამენტო არჩევნების მთავარი შეფასება, რომელიც ჩვენ მიერ ჩატარებული არჩევნების საერთაშორისო სტანდარტებთან შესაბამისობას განსაზღვრავს. საერთაშორისო სადამკვირვებლო მისიების შეფასება გაცილებით პოზიტიურია, ვიდრე წინა არჩევნებთან დაკავშირებულ დასკვნებში მოცემული შეფასებები. საუბარია იმაზე, რომ მოხდა საარჩევნო კანონმდებლობისა და გარემოს გაუმჯობესება. გვსურს, მადლობა გადავუხადოთ საერთაშორისო პარტნიორებს, სადამკვირვებლო მისიებს, რომლებიც პანდემიის მიუხედავად, ჩამობრძანდნენ საქართველოში, მხარი დაუჭირეს საქართველოს დემოკრატიულ განვითარებას და აკვირდებოდნენ ჩვენს საპარლამენტო არჩევნებს. ასევე, გვსურს, მადლობა გადავუხადოთ მთელს საზოგადოებას, ჩვენს მხარდამჭერებს. საჯარო ბრიფინგზე ნათქვამი იყო, რომ ჩვენი საერთაშორისო პარტნიორები მოელიან ახალ პარლამენტთან თანამშრომლობას შემდგომი რეფორმების, კანონმდებლობის გაუმჯობესების თვალსაზრისით გვსურს, განვაცხადოთ, რომ ჩვენ გვაქვს სრული მზადყოფნა, რომ დემოკრატიული რეფორმების შემდგომ პროცესში მაქსიმალურად ვითანამშრომლოთ საერთაშორისო პარტნიორებთან და ორგანიზაციებთან. ეს ანგარიში გახლავთ საქართველოს 2020 წლის საპარლამენტო არჩევნების შეფასება და მისი შედეგების აღიარება“ - განაცხადა არჩილ თალაკვაძემ.

31 ოქტომბერს ჩატარებული არჩევნების შედეგების ეტაპობრივ განახლებას თვალი შეგიძლიათ ადევნოთ ამ ბმულზე.