კახა კუჭავა: ხალხმა გადაწყვიტა ეს არჩევნები და პატივი სცენ მათ არჩევანს

ხალხმა გადაწყვიტა ეს არჩევნები და პატივი სცენ ხალხის არჩევანს, როგორც ეს მათ მოუწოდა ზუსტად დელეგაციის ხელმძღვანელმა PACE-დან, ევროსაბჭოდან, - ეს განცხადება „რუსთავი2“-ის ეთერში „ქართული ოცნების“ წევრმა კახა კუჭავამ გააკეთა.

„ჩვენ თავიდანვე ვაფრთხილებდით ყველას, რომ პროვოკაციებს ადგილი ექნებოდა ზუსტად იმიტომ, რომ მერე ჰქონოდათ საშუალება და არჩევნების შემდეგ ჰქონოდათ საფუძველი, რომ კითხვის ნიშნის ქვეშ დაეყენებინათ არჩევნების ლეგიტიმაცია. კითხვას გისვამთ, თუ დამისახელებთ ერთ ქვეყანას მაინც, ან თუ ჰქონდა საქართველოში ვინმეს იმის მოლოდინი, რომ არჩევნები სადმე ჩატარებულა ყოველგვარი დარღვევის გარეშე? გამორიცხულია. არის ხოლმე ტექნიკური შეცდომები, რომლებიც ძირითადად ფიქსირდება, რომლებსაც ადამიანი უშვებს, მაგრამ რამდენად მნიშვნელოვანია ამ შეცდომების რაოდენობა და მათი შინაარსი, რომ ამან დააყენოს კითხვის ნიშნის ქვეშ არჩევნები, აი ეს არის ყველაზე მთავარი“, - აღნიშნა კუჭავამ.

მისი თქმით, დღეს ოპოზიციის წარმომადგენლებიდან არავის უნდა პასუხი გასცეს ეუთო/ოდირის და სხვა დელეგაციის წევრების მილოცვებსა და დასკვნებს. „თუმცა როდესაც მათ სჭირდებოდათ, ძალიან კარგად იყენებდნენ მათ არგუმენტებს, მაგალითად საარჩევნო კოდექსთან დაკავშირებით ერთი წლის წინ, როდესაც იწყებოდა ამაზე მსჯელობა ენაზე ჰქონდა ყველას დახვეული, რომ აი, ოდირის რეკომენდაციები შეასრულეთ და ეუთოს ეს რეკომენდაციები გაითვალისწინეთ და ა.შ. დღეს, რომ აღარ აწყობთ, ეს აღარ აინტერესებთ“, - განაცხადა კუჭავამ.

საარჩევნო უბნებზე ხმების 100% დათვლილია. შედეგები ასეთია: „ქართული ოცნება“ - 48,15 %; „ნაციონალური მოძრაობა - გაერთიანებული ოპოზიცია“ - 27,14%; „ევროპული საქართველო“ - 3.78%; „ლელო“ – 3,15%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. რაც შეეხება დანარჩენ პარტიებს, მათ ამომრჩეველთა ხმების ერთ პროცენტზე ნაკლები აქვთ. საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლება და პროცედურების უმეტესობა დაცული იყო.

ოპოზიციის ნაწილი აქციებს აანონსებს. ისინი აცხადებენ, რომ არჩევნები გაყალბებულია და ერთიან სამოქმედო გეგმაზე მსჯელობენ. მათი ერთ-ერთი სცენარი არის ის, რომ ბოიკოტი გამოაცხადონ, უარი თქვან მანდატებზე და არ შევიდნენ პარლამენტში.