თამარ ჟვანიას თქმით, ცესკოში შესული საჩივრების ნაწილი დოკუმენტურ დასაბუთებას არის მოკლებული

მთავარია ყველაფერი იყოს სამართლებრივ ჩარჩოში და საარჩევნო ადმინისტრაცია ყველა ზომას მიიღებს, რომ აბსოლუტურად გამჭვირვალე და დასაბუთებულ საჩივრებზე იყოს პასუხები, - ამის შესახებ თამარ ჟვანიამ „იმედის“ გადაცემაში „არენა“ განაცხადა. ცესკოს თავმჯდომარის თქმით, ცესკოში დაახლოებით 1450 საჩივარია შესული, თუმცა მათი უმეტესობა მხოლოდ არჩევნების წინასწარი მონაცემების შემდეგ შევიდა.

„როდესაც უბანზე რაიმე არსებითი პრობლემა ხდება, უბანზევე უნდა იყოს დაფიქსირებული კონკრეტული საჩივარი, იმიტომ რომ იქვე, ადგილზე ფიქსირდება და დაუყოვნებლივ ხდება ამ საჩივრის დაწერა. ეს სხვათა შორის გააკეთეს იმ ადგილობრივმა სადამკვირვებლო ორგანიზაციებმა, რომლებიც იქ იყვნენ წარმოდგენილები და აბსოლუტურად სამართლებრივად სწორი ფორმა გამოიყენა რამდენიმე ორგანიზაციამ. მაგრამ როდესაც შემდგომში უკვე, შედეგების შემდეგ ხდება ასეთი საჩივრებით შეიძლება ითქვას პირდაპირი დაბომბვა საოლქო საარჩევნო კომისიების და მანამდე არ გაქვს ნათქვამი, რომ უბანში რაიმე პრობლემა იყო, ეს კითხვის ნიშნებს აჩენს, ცხადია. გასაგებია, რომ ოქმის მონაცემებზე შეიძლება იყოს საუბარი და ოქმის საკითხებზე იყოს საუბარი, მაგრამ ბევრი ისეთი საჩივარია, რომელიც კენჭისყრის პროცესს ეხება, დისციპლინარულ პროცესს ეხება, მაგრამ არჩევნების დღეს, სანამ შედეგები იქნებოდა ცნობილი, არავის ამაზე რაიმე ტიპის პრეტენზია არ დაუფიქსირებია გარდა ამ სადამკვირვებლო ორგანიზაციებისა“, - განაცხადა ჟვანიამ.

მისივე თქმით, საჩივრების პროცესი და ასეთი სამართლებრივი ფორმები ლეგიტიმურობის საკითხს არ უნდა უკავშირდებოდეს. მან ასევე აღნიშნა, რომ მიღებული საჩივრებიდან ყველა საფუძვლიანი არ არის.

„ჩვენ გვაქვს საჩივრები, რომლებიც საერთოდ რაიმე ტიპის დასაბუთებას არის მოკლებული და ასეთ შემთხვევებზე, ცხადია, ძალიან რთული იქნება გადაწყვეტილების მიღება“, - აღნიშნა ჟვანიამ.

საარჩევნო უბნებზე ხმების 100% დათვლილია. შედეგები ასეთია: „ქართული ოცნება“ - 48,22%; „ნაციონალური მოძრაობა - გაერთიანებული ოპოზიცია“ - 27,18%; „ევროპული საქართველო“ - 3.79%; „ლელო“ – 3,16%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. რაც შეეხება დანარჩენ პარტიებს, მათ ამომრჩეველთა ხმების ერთ პროცენტზე ნაკლები აქვთ. საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლება და პროცედურების უმეტესობა დაცული იყო.