თეა წულუკიანი: ოპოზიციას მათივე მოედანზე, მათივე წესებით ვეთამაშეთ და არჩევნებში მაინც ჩვენ გავიმარჯვეთ

ჩვენ მათ (ოპოზიცია) ვეთამაშეთ მათივე წესებით, მათივე მოედანზე და ამ არჩევნებში გავიმარჯვეთ, გაიმარჯვა 928 ათასზე მეტმა „ქართული ოცნების“ ამომრჩეველმა, რაც იმას ნიშნავს, რომ კოალიციური მთავრობა აღმასრულებელ ხელისუფლებაში არ იქნება, მათ ეს არ მოსწონთ. მათ მოსწონთ ერთადერთი, რომ აყირავდეს ქვეყანა, იყოს დესტაბილიზაცია და მოხდეს რევოლუციური სცენარის განვითარება, რისთვისაც მათ ჩვენ არცერთი არგუმენტი არ დავუტოვეთ“, - ამის შესახებ „ქართული ოცნების“ პარტიული სიის მეოთხე ნომერმა, თეა წულუკიანმა „ქრონიკაში“ განაცხადა.

„ჩვენ რომ არ წავსულიყავით დათმობებზე და არ გვქონოდა ის საარჩევნო მოდელი, რაც დღეს გვაქვს, დააკვირდით მათ ქცევას, ისინი ვერ ამბობენ, რომ არჩევნები ჩატარდა იმ საარჩევნო მოდელით, რომელიც მათ არ უნდოდათ, არჩევნები ჩატარდა იმ საარჩევნო მოდელით, რომელიც მათ მოსწონდათ, სურდათ და რაზეც ხელი მოაწერეს, ჩვენ ეს არგუმენტი სწორი პოლიტიკით გამოვაცალეთ. ისინი ვერ ამბობენ იმას, რომ ბარიერი იმდენად დიდია, რომ ვერ შევდივართ პარლამეტში, ამას არ ამბობენ, იმიტომ, რომ ჩვენ უპრეცედენტო, 1-პროცენტიანი ბარიერი შევქმენით, ეს ნაბიჯიც გადავდგით და მათ ეს არგუმენტიც ხელიდან გამოვაცალეთ. საერთაშორისო პარტნიორების ჩართულობით მოხდა ის წინსვლა, რომ საარჩევნო მოდელი ყოფილიყო უფრო პრურალისტური, დემოკრატიული და ამას ეთანხმებოდნენ თვითონვე.

ისინი ასევე ვერ საუბრობენ იმაზე, რომ ეს არის „ქართული ოცნებისთვის“ ხელისუფლებაში ჰყოფნის ბოლო წუთები და ისინი მოდიან ხელისუფლებაში, ანუ იმასაც ვერ ამბობენ, რომ ისინი არიან პირველი პოლიტიკური ძალა, არადა ამას ამბობდნენ არჩევნებამდე“, - განაცხადა თეა წულუკიანმა.

საარჩევნო უბნებზე ხმების 100% დათვლილია. შედეგები ასეთია: „ქართული ოცნება“ - 48,22%; „ნაციონალური მოძრაობა - გაერთიანებული ოპოზიცია“ - 27,18%; „ევროპული საქართველო“ - 3.79%; „ლელო“ – 3,16%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. რაც შეეხება დანარჩენ პარტიებს, მათ ამომრჩეველთა ხმების ერთ პროცენტზე ნაკლები აქვთ.

საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლება და პროცედურების უმეტესობა დაცული იყო.

ოპოზიციურმა პარტიებმა კი ოფიციალური დოკუმენტი მიიღეს და ხელმოწერით დაადასტურეს, რომ პარლამენტში არ შევლენ.