ირაკლი კობახიძე ოპოზიციაზე: ვმუშაობთ, რომ ისინი სწორ გზაზე დავაყენოთ

ყველა საერთაშორისო პარტნიორი მოუწოდებს პოლიტიკურ პარტიებს დიალოგისა და კონსულტაციებისკენ და მათი პასუხია ულტიმატუმი. ბუნებრივია, ისინი მიიღებენ მკაცრ პასუხს ასეთ ულტიმატუმზე ყველასგან, მათ შორის ქართული საზოგადოებისგან და ასევე საერთაშორისო პარტნიორებისგან, - ამის შესახებ პარტია „ქართული ოცნების“ აღმასრულებელმა მდივანმა, ირაკლი კობახიძემ ეუთო/ოდირის საერთაშორისო სადამკვირვებლო მისიასთან მორიგი სამუშაო შეხვედრის დასრულების შემდეგ ჟურნალისტებს განუცხადა.

მისი თქმით, ოპოზიციას არ აქვს არავითარი უფლება საზოგადოებასა და საერთაშორისო პარტნიორებს ულტიმატუმის ენით ელაპარაკოს.

„ბუნებრივია, მათ არ აქვთ არავითარი უფლება საზოგადოებასა და საერთაშორისო პარტნიორებს ულტიმატუმის ენით ელაპარაკონ. მათ ამას არავინ გაუტარებს. რაც შეეხება მათ ულტიმატუმს, რომ ჯერ უნდა დაინიშნოს ვადამდელი საპარლამენტო არჩევნები და მერე დასხდებიან მოლაპარაკების მაგიდასთან, ეს არასწორი დამოკიდებულებაა საერთაშორისო პარტნიორებისა და ქართული საზოგადოების მიმართ. მათ უნდა შეიცვალონ საკუთარი მიდგომა და ჩვენ ვმუშაობთ იმისთვის, რომ ისინი სწორ გზაზე დავაყენოთ. მათ ძალიან კარგად იციან, როგორია არჩევნებში მათი შედეგები. მაგალითად, როდესაც საუბარია „ევროპულ საქართველოზე“. მისმა ერთ-ერთმა ლიდერმა, თამარ ჩერგოლეიშვილმა განაცხადა, რომ „ევროპულმა საქართველომ“ წინა არჩევნებთან შედარებით დაკარგა ასი ათასი ხმა. ამით პარტიის ერთ-ერთმა ლიდერმა აღიარა ის შედეგი, რომელიც დაფიქსირდა. ახლა შეიძლება შეატრიალოს ეს, მაგრამ ეს ნათქვამი აქვს. ასევე სხვა პარტიებმაც კარგად იციან, რომ აღებული აქვთ ერთი პროცენტი და ა.შ. მათ კარგად იციან არჩევნების მონაცემები და აქედან გამომდინარე, ბუნებრივია ეს ქმნის ძალიან კარგ საფუძველს იმისთვის, რომ საბოლოო ჯამში, მათ მიიღონ გადაწყვეტილება პარლამენტში შემოსვლასთან დაკავშირებით. გარდა იმისა, რომ პარტიებს აქვთ განსხვავებული პოზიციები, კონკრეტული პარტიების შიგნითაც არიან ადამიანები, მაგალითად, „ნაციონალურ მოძრაობაში“ არიან ადამიანები, რომლებსაც თითოეულს რამდენიმე მილიონი აქვს ამ არჩევნებში დახარჯული და მათ პირდაპირ ინტერესებშია პარლამენტში შემოსვლა. არის უამრავი განსხვავებული ინტერესი, რომელიც ფულის ხარჯვასთან არის დაკავშირებული, რეალობის აღქმასთანაც და ა.შ. არის სხვადასხვა ინტერესები, რაც საბოლოო ჯამში, ამ ადამიანებს უბიძგებს, რომ პარლამენტში შემოვიდნენ“, - განაცხადა ირაკლი კობახიძემ.