ირაკლი კობახიძე: მზად ვართ, ინფორმაცია არჩევნების კორექტულად და დემოკრატიულად ჩატარებასთან დაკავშირებით, ნებისმიერ სუბიექტს მივაწოდოთ

არსებობს მარტივი მონაცემები, რაც ადასტურებს იმას, რომ არჩევნები ჩატარდა დემოკრატიულ გარემოში, ეს არის მათ შორის სტატისტიკური ინფორმაცია, ყველაფერი ადასტურებს იმას, რომ ის მონაცემები, რაც არის დაფიქსირებული ცესკოს მიერ, არის ზუსტად ის, რაც ემთხვევა ამომრჩევლის განწყობას, - ამის შესახებ პარტია „ქართული ოცნების“ აღმასრულებელმა მდივანმა, ირაკლი კობახიძემ ეუთო/ოდირის საერთაშორისო სადამკვირვებლო მისიასთან მორიგი სამუშაო შეხვედრის დასრულების შემდეგ ჟურნალისტებს განუცხადა.

მისივე თქმით, არჩევნები ჩატარდა აბსოლუტურად დემოკრატიულ გარემოში.

„იყო სპეკულაციები, მაგალითად არასწორად შედგენილი ოქმებით მანიპულაცია და ა.შ. რის საფუძველზე ისინი (ოპოზიცია) ამტკიცებენ იმას, რაც ბუნებაში არ არსებობს. რეალურად მთავარი ჩვენი არგუმენტი არის ის, რომ არჩევნები ჩატარდა აბსოლუტურად დემოკრატიულ გარემოში და ამასთან დაკავშირებით ჩვენ მზად ვართ ყველასთან დისკუსიისთვის, მათ შორის მზად ვართ იმისთვის, რომ ინფორმაცია არჩევნების კორექტულად და დემოკრატიულად ჩატარებასთან დაკავშირებით მივაწოდოთ ნებისმიერ სუბიექტს, როგორც პოლიტიკურ პარტიებს, ასევე არასამთავრობო ორგანიზაციებს. ჩვენ შეგვიძლია პარტიები დავარწმუნოთ იმაში, რაშიც უკვე დარწმუნებულები არიან ჩვენი მთავარი საერთაშორისო პარტნიორები“, - განაცხადა ირაკლი კობახიძემ.

8 ნოემბერს ოპოზიციური პარტიების წარმომადგენლებმა პარლამენტთან საპროტესტო აქცია გამართეს და თავიანთი მოთხოვნები გააჟღერეს. მათ შორის არის: 31 ოქტომბრის არჩევნების შედეგების არალეგიტიმურად ცნობა, რიგგარეშე არჩევნების ჩატარება და ცენტრალური საარჩევნო კომისიის ხელახალი დაკომპლექტება.