ბექა დავითულიანი ოპოზიციაზე: თუ მათ აქვთ პოლიტიკური პასუხისმგებლობა, უნდა შევიდნენ პარლამენტში და განახორციელონ ის ფუნქცია, რისთვისაც ხალხმა აირჩია

ხალხის დაკვეთა იყო მრავალპარტიული პარლამენტი, სადაც პოზიცია იქნებოდა წარმოდგენილი იმ დოზითა და პროპორციით, რომლითაც არის წარმოდგენილი. ხალხის დაკვეთა არ ყოფილა ვინმეს გადატრიალება და დამხობა. თუ მათ აქვთ პოლიტიკური პასუხისმგებლობა, უნდა შევიდნენ პარლამენტში და განახორციელონ ის ფუნქცია, რისთვისაც ხალხმა აირჩია, - განაცხადა „ქართული ოცნების“ პროპორციული სიის წევრმა, ბექა დავითულიანმა „იმედის“ გადაცემაში „არენა“.

„უკანასკნელი 8 წლის განმავლობაში, ოპოზიციის რადიკალური ფრთის მთელი ძალისხმევა მიმართულია მხოლოდ იმისკენ, რომ ხელისუფლება არა არჩევნების გზით მოიპოვონ, რადგან არჩევნების გზით, მათ არაერთხელ იწვნიეს მარცხი და ამას ვერ ეგუებიან. ისინი აღიარებენ კიდეც ამას. წამოცდენები და მინიშნებები აქვთ ყოველდღე. სააკაშვილის ყოველი გამოსვლა არის ამისკენ მოწოდება. ზღვარზე გადიან ვინც მათთანაა. სისხლის სამართლის მუხლის ფაბულას თუ წაუკითხავ, გეტყვიან: „არა, ამას არ ვაპირებთ“, მაგრამ მათი ყველა მოწოდება ამისკენ იყო, მთელი წინასაარჩევნო პერიოდი, არჩევნების დღეს... ცესკო-ში შეჭრას, საერთოდ, რა აზრი ჰქონდა, ვერ ვხვდები, გარდა იმისა, რომ განადგურებულიყო ამ არჩევნების მთავარი მტკიცებულება: საარჩევნო ოქმები და ხმები. ხმების გადათვლასთან ერთად, დაიწყო ამ პროცესის დისკრედიტაცია. ხმების გადათვლის პროცესს ესწრებოდნენ ოპოზიციის წარმომადგენლები, უფლებამოსილი პირები, პარალელურად, ოპოზიციის წარმომადგენლები იდგნენ ქუჩაში და ყვიროდნენ, რომ მათ წარმომადგენლებს შიგნით არ უშვებდნენ. ამ დროს, ფაქტობრივი მოცემულობა იყო, რომ შიგნით ისხდნენ მათი წარმომადგენლები და არასამთავრობო ორგანიზაციების თანდასწრებით, ხმებს თვლიდნენ. ეს მიგვანიშნებს, რომ მათი ამოცანა ხმების გადათვლა არ ყოფილა და ყველაფერს აკეთებდნენ იმისთვის, რომ სხვა სცენარი განხორციელებულიყო. თუმცა, ამ სცენარსაც სჭირდება ლეგიტიმაცია და მხარდაჭერა. ხალხის დაკვეთა იყო მრავალპარტიული პარლამენტი, სადაც პოზიცია იქნებოდა წარმოდგენილი იმ დოზითა და პროპორციით, რომლითაც არის წარმოდგენილი. ხალხის დაკვეთა არ ყოფილა ვინმეს გადატრიალება და დამხობა. ისინი ლეგიტამიციის ამ ემოციასაც ვერ გრძნობენ. შესაბამისად, მათ არც ამის ძალა აქვთ და არც სახელმწიფოა ისეთი, რომ მათთვის „პოზიტიური“ გამოცდილება გაიმეოროს. დღეს ეს მდგომარეობა არაა და ეს არც ერთ შემთხვევაში არ გამოვა, არ მოხდება იმ მოქალაქეების პოზიციის რევიზია, რომელთაც მხარი დაგვიჭირეს და არც მათი მხარდამჭერების პოზიციის რევიზია არ უნდა მოხდეს. თუ მათ აქვთ პოლიტიკური პასუხისმგებლობა, უნდა შევიდნენ პარლამენტში და განახორციელონ ის ფუნქცია, რისთვისაც ხალხმა აირჩია“ - განაცხადა ბექა დავითულიანმა.