დავით ზალკალიანი: 2020-2021 წლის სენატის ასიგნების კომიტეტის მიერ დამტკიცებულ კანონპროექტში საქართველოს დასახმარებლად 132 მილიონი დოლარი განისაზღვრა

2020 წლის 10 ნოემბერს გასაჯაროვდა 2020-2021 წლის ფისკალური წლის ამერიკის შეერთებული შტატების საბიუჯეტო კანონის სენატის ასიგნების კომიტეტის ვერსია. წარმოდგენილი კანონპროექტის თანახმად, საქართველოს დასახმარებლად განისაზღვრა 132 მილიონი დოლარი, - ამის შესახებ საგარეო საქმეთა მინისტრმა, დავით ზალკალიანმა განაცხადა.

საგარეო საქმეთა მინისტრის თქმით, პროექტის ამავე ქვეთავში ასევე მოქცეულია საქართველოს მხარდამჭერი გზავნილი, საქართველოს ტერიტორიების აფხაზეთისა და ცხინვალის რეგიონის, სამხრეთ ოსეთის ოკუპაცია, რომლის თანახმადაც, კანონით გამოყოფილი ფინანსებით ვერ ისარგებლებს იმ სახელმწიფოს ცენტრალური მთავრობა, რომელთა მიმართებაშიც აშშ-ის სახელმწიფო მდივანი დაადგენს და შესაბამის კომიტეტს წარუდგენს ანგარიშს, რომ ამ ქვეყანამ აღიარა რუსეთის მიერ ოკუპირებული აფხაზეთისა და ცხინვალის რეგიონის დამოუკიდებლობა.

„კანონპროექტი ცხადყოფს ძალიან მნიშვნელოვან ტენდენციებს: პირველი - საქართველოსთან დაკავშირებული საკითხი აშშ-ის საკანონმდებლო პროცესის განუყოფელი ნაწილია და ჩვენ ქვეყანასთან ურთიერთობა აშშ-ის საგარეო პოლიტიკის დღის წესრიგის ერთ-ერთი მნიშვნელოვანი მიმართულებაა. საქართველოს სუვერენიტეტი და ტერიტორიული მთლიანობა და ჩვენი ქვეყნის უსაფრთხოება, წარმოადგენს მთლიან ევროპის უსაფრთხოების განუყოფელ ნაწილს, უმთავრესია იმის აღნიშნა, რომ კანონპროექტი საქართველოს ოკუპირებულ ტერიტორიებთან დაკავშირებული დეფინიცია უკვე მეხუთე წელია უცვლელად მეორდება და მნიშვნელოვანია, რომ ჩვენთვის მნიშვნელოვანი განსაზღრება არის ჩადებული ამ კანონპროექტში“, - განაცხადა დავით ზალკალიანმა.

მინისტრის თქმით, ყოველწლიურად იზრდება საქართველოსთვის ფინანსური მხარდაჭერა და აღსანიშნავია, რომ ბოლო 4 წელიწადში ეს მხარდაჭერა 50 მილიონით გაიზარდა.

„სენატის ასიგნების კომიტეტის მიერ დამტკიცებულ კანონპროექტში არ არის ის დათქმა, რაც იყო დაკავშირებული 15%-იან შეზღვუდვასთან დაკავშირებით, რომელიც არსებობდა კანონის წარმომადგენლობითი პალატისმიერ 2020 წლის 24 ივლისის მიღებულ ვერსიაში, რაც კიდევ ერთხელ ადასტურებს იმას, რომ საქართველოს ქვეყნის დემოკრატიული განვითარების მიმართულებით უმნიშვნელოვანესი პროგრესი არსებობს.

ეს კიდევ ერთხელ ადასტურებს, თუ როგორ არ უნდა გამოიყენონ ოპონენტებმა საკუთარი პოლიტიკური ინტერესებისთვის მთავარ სტრატეგიულ პარტნიორთან, აშშ-თან ქვეყნის ურთიერთობა“, - განაცხადა საგარეო საქმეთა მინისტრმა.