საკონსტიტუციო პროექტის მე-5 მუხლმა უმრავლესობაში დებატები გამოიწვია

საკონსტიტუციო ცვლილებების პროექტის მეორე მოსმენით მუხლობრივი განხილვისას იურიდიულ საკითხთა კომიტეტის სხდომაზე კანონპროექტის მე-5 მუხლი, რომელიც სოციალურ სახელმწიფოს ეხება, მმართველ გუნდში ცხარე დებატების საგანი გახდა.

„ევროპას რომ გავიძახით, ისე არ არის, რომ თქვა - ევროპა. „ნაციონალებმაც“ დაიქვეს „ევროპული საქართველო“. ეს ევროპული წესია. სოციალური საკითხების დეკლარირება და სახელწმიფოს მიერ ამ სფეროზე პასუხისმგელობის აღება რომ ამ სფეროებზე პოლიტიკას შეიმუშავებს, უპირობოდ ევროპული მოდელია. ეჭვიც კი არ უნდა შევიტანოთ იმაში, რომ ეს აქ უნდა იყოს. ეს სხდომა ღიაა და ამას ხალხი უსმენს. ხიფათი იმისა, რომ ვინმემ სხვანაირად გაიგოს, ეს მხოლოდ ამას არ ეხება, მთელ კონსტიტუციას უნდა მოვექცეთ ფრთხილად მაშინ, რომ ვინმემ სხვანაირად რამე არ გაიგოს. თუ რაღაც სწორად არ იქნება გაგებული, ამას სახელმწიფოს განმარტავს. ჩვენგან კარგი მესიჯი არ არის, რომ უარი განვახადოთ ან ფრთხილად მოვექცეთ სოციალური პოლიტიკის მიმართულებებს, რადგან ეს ჩვენი აღიარებული პრიორიტეტია და ამ საკითხებზე მსჯელობა საზოგადოდ ხელსაყრელი არ არის. ასეთი ხიფათებისგან თავი იმით უნდა დავიცვათ, რომ კანონი კანონობდეს. შეჭრა კრიმინალია და ყველაფერი შეიძლება მოხდეს“, - აღნიშნა ჟორჟოლიანმა.

ამ საკითხს დეპუტატი ბექა ნაცლიშვილიც გამოეხმაურა.„კონსტიტუციაში ღირსეული საცხოვრებლის ასახვა ჩვენი პარტიის ინიციატივა იყო და ამ მუხლს არ დავთმობთ. თუ ინტერპრეტაციებზე ვსაუბრობთ, მაშინ შეიძლება ბიზნესმა მექვსე მუხლიც არასწორად გაიგოს და თქვას, რომ აღარ დავიბეგრებით, რადგან ნებისმიერი დაბეგვრა ნიშნავს, რომ ჩვენი ეკონომიკური თავისუფლება შეიზღუდება. ამაზე მსჯელობა აბსურდია. ეს ზოგადი მიზნებია, რომლის მიმართულებითაც სახელმწიფომ პროგრესულად, დროდადრო ნაბიჯები უნდა გადადგას“, -  აღნიშნა ნაცვლიშვილმა.

ეს განცხადებები მოჰყვა "ქართული ოცნების" წევრის გრიგოლ ლილუაშვილის განცხადებას, რომ კონსტიტუციური ჩანაწერი "სახელმწიფო ზრუნავს მოქალაქეთა ჯანმრთელობისა და სოციალურ დაცვაზე, საარსებო მინიმუმითა და ღირსეული საცხოვრებლით უზრუნველყოფაზე" სიფრთხილეს საჭიროებს. 

„ფორმულირებასთან ფრთხილად ვიყოთ. მოქალაქეებმა ღირსეული საცხოვრებლით უზრუნველყოფა ისე არ გაიგონ, რომ სოფელს დატოვებენ, როგორც დღეს ხდება,  თბილისში ჩავლენ, სადღაც შეიჭრებიან და იქ უნდა იცხოვრონ“, - განაცხადა ლილუაშვილმა.

პარლამენტის იურიდიულ საკითხთა კომიტეტის სხდომაზე საკონსტიტუციო ცვლილებების პროექტს განიხილავენ. კანონმდებლები დოკუმენტზე მუხლობრივად მსჯელობენ. დეპუტატებს ცვლილებების არსს პარლამენტის თავმჯდომარე ირაკლი კობახიძე აცნობს.

კომიტეტის სხდომას მხოლოდ საპარლამენტო უმრავლესობის წევრები, რადგან საპარლამენტო ოპოზიცია ისევ ბოიკოტის რეჟიმშია.

საკანონმდებლო ორგანომ კონსტიტუციური ცვლილებები პირველი მოსმენით 115 მომხრე ხმით გუშინ მიიღო. რიგგარეშე სხდომის ფორმტში საკითხზე მსჯელობა მეორე მოსმენის რეჟიმში დღეს გაგრძელდება.