შალვა ნათელაშვილი: ელჩებს იმიტომ არ ვხვდებით, რომ ვინმემ დათმობაზე წაგვიყვანოს

„ევროკავშირის ელჩთან ერთი-ერთზე შეხვედრა გაიმართა. ძალიან სასიამოვნოა, რომ ჩვენი სტრატეგიული პარტნიორები ასე ზრუნავენ საქართველოს დღევანდელობაზე, მის პროგრესულ განვითარებასა და უსაფრთხოებაზე, მათ შორის „საარჩევნო უშიშროებაზე“, - ამის შესახებ „ლეიბორისტული“ პარტიის ლიდერმა შალვა ნათელაშვილმა განაცხადა.

„ჩვენ ვართ არჩევნებით დაზარალებული ქვეყანა, ალბათ ერთადერთი დედამიწის ზურგზე, სადაც ხელისუფლება განზრახ არ თვლის სწორად არჩევნების შედეგებს. ჩვენ ეს კრიზისი უნდა გამოვიყენოთ იმისთვის, რომ საქართველოში არჩევნები არასდროს არ გაყალბდეს“, - აღნიშნა ნათელაშვილმა.

მისი თქმით, საუბრის შინაარსის გასაჯაროება დიპლომატიური პროტოკოლით დაუშვებელი და შეუძლებელია, თუმცა ზოგადი პრინციპები, რაზეც საზოგადოებაში ვნებათაღელვაა, ცნობილია და საიდუმლო არაფერია.

„ჩვენი პოზიცია ცხადზე ცხადია. ქართული ოპოზიცია აცხადებს, რომ ეს პარლამენტი არ უნდა შედგეს“, - აღნიშნა შალვა ნათელაშვილმა.

რაც შეეხება ფორმატს, შალვა ნათელაშვილის თქმით, შეხვედრები იმართება როგორც ცალ-ცალკე, ასევე კოლექტიურად და ამას მასპინძელი მხარე ირჩევს,

„ელჩებს იმიტომ არ ვხვდებით, რომ ვინმემ დათმობაზე წაგვიყვანოს. ამას არც ერთი ელჩი არ იკადრებს და რა თქმა უნდა, ჩვენ ვხელმძღვანელობთ ჩვენი ქვეყნის ინტერესებიდან, ჩვენი ხალხის დავალებიდან“, - განაცხადა შალვა ნათელაშვილმა.

ხვალ არჩევნების მეორე ტურია, ოპოზიცია მას ბოიკოტს უცხადებს და ხელახალ არჩევნებს ითხოვს, რასაც „ქართული ოცნება“ არ განიხილავს. მხარეებს შორის უცხოელი პარტნიორების შუამავლობით მოლაპარაკებათა ორი რაუნდი გაიმართა. მესამე რაუნდი კი სავარაუდოდ მეორე ტურის შემდეგ შედგება.