ქუთაისში ბოლო მონაცემებით 4,223-მა ამომრჩეველმა საკუთარი არჩევანი დააფიქსირა

ქუთაისში ბოლო მონაცემებით 4,223-მა ამომრჩეველმა საკუთარი არჩევანი დააფიქსირა, რაც საერთო ამომრჩევლის 2,73 პროცენტია. საოლქო კომისიის თავმჯდომარის ლარინა ლალიაშვილის ინფორმაციით, ეს მონაცემები პირველ ტურთან შედარებით დაბალია. პირველ ტურზე ამ დროის მონაცამებით 7,2 % პროცენტი იყო მისული საარჩევნო უბნებთან. ამ დროისთვის რამე დარღვევა არ დაფიქსირებულა და საოლქო კომისიაში საჩივარი არ შემოსულა.

ქუთაისში 130 უბანია გახსნილი, მათ შორის შვიდი სპეცუბანია. ექვსი თვითიზოლაციაში მყოფ პირებს და კოვიდინფიცირებულებს ემსახურება, ერთი პენიტენციურ დაწესებულებაშია განთავსებული. ქუთაისში სულ 154,928 ამომრჩეველია რეგისტრირებული.

მაჟორიტარული არჩევნების მეორე ტური 17 ოლქში ტარდება. არჩევნების პირველ ტურში 13 ოლქში „ქართული ოცნების“ კანდიდატებმა გაიმარჯვეს. რაც შეეხება პროპორციულ სისტემას, ცესკოს ინფორმაციით, ბიულეტენების 100%-ის დათვლის შემდეგ შედეგები ასეთია: „ქართული ოცნება“ - 48,22%; „ნაციონალური მოძრაობა - გაერთიანებული ოპოზიცია“ - 27,18%; „ევროპული საქართველო“ - 3.79%; „ლელო“ – 3,16%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. დანარჩენ პარტიებს ამომრჩეველთა ხმების ერთ პროცენტზე ნაკლები აქვთ.

საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლებები და პროცედურების უმეტესობა დაცული იყო.