მცხეთა-მთიანეთის ოლქში საარჩევნო პროცესი მშვიდ ვითარებაში მიმდინარეობს

მცხეთა - მთიანეთი - დუშეთი - ყაზბეგის ოლქში მეორე ტურის კანდიდატებია ცეზარ ჩოჩელი და შალვა კერესელიძე არიან. მათგან ერთ-ერთი მაჟორიტარი დეპუტატი გახდება. ქართული ოცნების მაჟორიტარობის კანდიდატმა შალვა კერესელიძემ დუშეთის მეორე უბანზე გააკეთა არჩევანი.

მე-11 საარჩევნო ოლქში, სადაც 88 ათასამდე ამომრჩეველია რეგისტრირებული, პროცესი მშვიდ ვითარებაში, ხარვეზების გარეშე მიმდინარეობს.

„მეორე ტური ძალიან მშვიდ გარემოში მიმდინარეობს, არა მხოლოდ დუშეთში, არამედ - მთლიანად, მცხეთა-მთიანეთის რეგიონში და საქართველოში, იქ, სადაც მეორე ტური იმართება. მე ხმას მივეცი საქართველოს წარმატებასა და მომავალს. ღრმად მჯერა, რომ ყველაფერი კარგად იქნება, მშვიდად. ძალიან მალე, ახალი პარლამენტი ძალიან მშვიდ გარემოში დაიწყებს მუშაობას“, - განაცხადა შალვა კერესელიძემ.

მაჟორიტარული არჩევნების მეორე ტური 17 ოლქში ტარდება. არჩევნების პირველ ტურში 13 ოლქში „ქართული ოცნების“ კანდიდატებმა გაიმარჯვეს. რაც შეეხება პროპორციულ სისტემას, ცესკოს ინფორმაციით, ბიულეტენების 100%-ის დათვლის შემდეგ შედეგები ასეთია: „ქართული ოცნება“ - 48,22%; „ნაციონალური მოძრაობა - გაერთიანებული ოპოზიცია“ - 27,18%; „ევროპული საქართველო“ - 3.79%; „ლელო“ – 3,16%; „პატრიოტთა ალიანსი“ – 3,14%; „სტრატეგია აღმაშენებელი“ –3,15 %; „გირჩი“ – 2,89%; „ალეკო ელისაშვილი – მოქალაქეები“ – 1,33%; „ლეიბორისტული პარტია“ – 1%. დანარჩენ პარტიებს ამომრჩეველთა ხმების ერთ პროცენტზე ნაკლები აქვთ.

საერთაშორისო დამკვირვებლებმა დაადასტურეს, რომ საქართველოში საპარლამენტო არჩევნებზე ფუნდამენტური თავისუფლებები და პროცედურების უმეტესობა დაცული იყო.