გიორგი ხელაშვილი: ოპოზიციისგან არ მოგვისმენია რაიმე არსებითი მტკიცებულება იმის შესახებ, თუ რატომ იყო არჩევნები გაყალბებული ან არშემდგარი - ესაა პოლიტიკური „ფეხის ბაკუნი“

თავისი შინაარსით, პლებისციტი მოსახლეობის გაცილებით დაბალი დონის გამოკითხვაა, ვიდრე რეფერენდუმი და მით უმეტეს - არჩევნები. სულ რამდენიმე კვირის წინ, საქართველოს მოსახლეობამ ძალიან მკაფიოდ დააფიქსირა საკუთარი არჩევანი. ჩვენ ოპოზიციისგან არ მოგვისმენია რაიმე არსებითი მტკიცებულება იმის შესახებ, თუ რატომ იყო ეს არჩევნები გაყალბებული ან არშემდგარი, რაც, შეიძლება, ხელახალი არჩევნებისა და პლებისციტის ჩატარების საფუძველი იყოს, - ამის შესახებ „ქართული ოცნების“ სიის წევრმა გიორგი ხელაშვილმა გადაცემაში „ქრონიკა“ განაცხადა.

„პრობლემა სწორედ იმაშია, რომ მათ უარი თქვეს ნებისმიერი სახის განხილვაზე, იქნებოდა ეს ვიდეომასალის შემოწმება, გადათვლა უბნებზე, საჩივრების არსებითი განხილვა და ა.შ. ეს იყო პოლიტიკური „ფეხის ბაკუნი“ იმისთვის, რომ საკუთარ პოლიტიკურ მიზნებს მიაღწიონ. შესაბამისად, სახელმწიფოებრივი თვალსაზრისით, არასწორია, როდესაც რომელიმე, ან, თუმდაც, რამდენიმე წვრილი პოლიტიკური პარტიის მოთხოვნის საფუძველზე, სახელმწიფო თავისსავე ჩატარებულ არჩევნებზე უარს ამბობს და შემდეგ ამ არჩევნებში შეაქვს ეჭვი, პლებისციტის სახით“ - განაცხადა გიორგი ხელაშვილმა.

დღეს ოპოზიციასა და ხელისუფლებას შორის მოლაპარაკებების მესამე რაუნდი გაიმართა. შეხვედრამდე, ოპოზიციის ოთხ პუნქტიანი გეგმა გასაჯაროვდა, რომელიც მათ ხელისუფლებას, ფასილიტატორი ელჩების საშუალებით წარუდგინეს. მმართველი გუნდის ოპონენტები ამას არ ადასტურებენ, თუმცა არც უარყოფენ და აცხადებენ, რომ უკეთესი იქნებოდა შეხვედრამდე აღნიშნული დოკუმენტი არ გასაჯაროებულიყო.

გეგმის პირველი პუნქტი პოლიტპატიმრების გათავისუფლებაა. მეორე პუნქტის მიხედვით, უნდა დაინიშნოს ახალი არჩევნები ან უნდა ჩატარდეს პლებისციტი შეკითხვით: „უნდა ჩატარდეს თუ არა რიგგარეშე საპარლამენტო არჩევნები 2021 წლის შემოდგომაზე, ადგილობრივი თვითმმართველობის არჩევნებთან ერთად. იმ შემთხვევაში, თუ პლებისციტში მონაწილეთა უმრავლესობა კითხვას დადებითად უპასუხებს, რიგგარეშე საპარლამენტო არჩევნები უნდა ჩატარდეს 2021 წლის შემოდგომაზე ადგილობრივ არჩევნებთან ერთად.

რიგგარეშე არჩევნები უნდა ჩატარდეს ამ შეთანხმების მე-3 და მე-4 პუნქტების გათვალისწინებით, სადაც ოპოზიცია სრულად პროპორციულ საარჩევნო სისტემას და საარჩევნო ადმინისტრაციის ცვლილებას ითხოვს.