გიგა ბოკერია: ოპოზიციის წარმომადგენელებს შორის შეხვედრაზე უნდა გადაწყდეს ხელისუფლებასთან მოლაპარაკებების დეტალების გასაჯაროების საკითხი

ოპოზიციის წარმომადგენელებს შორის დღევანდელ შეხვედრაზე უნდა გადაწყდეს ხელისუფლებასთან მოლაპარაკებების დეტალების გასაჯაროების საკითხი. ამის შესახებ „ევროპული საქართველოს“ ერთ-ერთმა ლიდერმა გიგა ბოკერიამ ჟურნალისტებს „ლელოს“ ოფისში შეხვედრის დაწყებამდე განუცხადა.

„ამ გაუგებრობით, პირველ რიგში, ივანიშვილის რეჟიმის პროპაგანდა სარგებლობს“,- აღნიშნა ბოკერიამ.

„არაფერი არ შეცვლილა, იგივე პოზიცია გვაქვს, უბრალოდ, ბუნებრივია, ყველა ეტაპზე გვაქვს ერთმანეთთან კონსულტაცია. პრობლემად რჩება, რაც უნდა გადაწყდეს, გასაჯაროება ყველა იმ რელევანტური დოკუმენტის. მიუხედავად იმისა, რომ ჩვენი პოზიცია ცნობილია, დეტალებს მნიშვნელობა აქვს და საზოგადოებას აქვს უფლება, რომ ჰქონდეს სრულფასოვანი ინფორმაცია“,- განაცხადა ბოკერიამ.

რაც შეეხება ხელისუფლებასთან მოლაპარაკებებს, როგორც გიგა ბოკერია აღნიშნავს, არსებით საკითხებზე პოზიციები ჯერ არ დაახლოებულა.

„არსებით საკითხებზე, ჯერჯერობით ვერ ვიტყოდი, რომ პოზიციები დაახლოვდა. ეს ჩვეულებრივი ამბავია მოლაპარაკებებში, მოულოდნელი და დრამატული არაფერია. დრამატული არის კრიზისი, რომელშიც ვართ და არა ის, რომ მოლაპარაკებები აქამდე ჯერ არ დაძრულა არსებითად. ჩვენი ამოცანაა ჩატარდეს ახალი, ნორმალური არჩევნები, რაც თავის თავში ბევრ კომპონენტს მოიცავს. ლაპარაკი იმაზე, რომ პრობლემის გადაწყვეტას მივუახლოვდით, ვითარების ზუსტი აღწერა არ იქნება, ეს ასე არ არის და არც მოულოდნელი არაა ეს ჩემთვის“,- განაცხადა ბოკერიამ.

„ლელოს“ ოფისში ოპოზიცია კონსულტაციებს მართავს.