შალვა პაპუაშვილი: ოპოზიციის პროპაგანდისტული ნაწილი აგონიაშია გადასული

როდესაც ისინი ახსენებენ „წითელ ხაზებს“, ამის უკან უნდა იყო არგუმენტები. სხვა შემთხვევაში, ესაა აკვიატება და ახირება. როდესაც ჩვენ ვსაუბრობთ, რომ რიგგარეშე არჩევნები გამორიცხულია, ამის მიღმა ძალიან მარტივი არგუმენტი დგას; არ არსებობს არც ერთი ფაქტი, რომელიც მიუთითებს იმაზე, რომ 31 ოქტომბრის არჩევნების შედეგები არ ასახავს მოსახლეობის ნებას, - ამის შესახებ ტელეკომპანია „იმედის“ გადაცემაში „არენა“ „ქართული ოცნების“ საარჩევნო სიის წევრმა, შალვა პაპუაშვილმა განაცხადა.

„მათ, დედამიწის ზურგზე, ვერ ნახეს ვერც ერთი საერთაშორისო სადამკვირვებლო ორგანიზაციის წარმომადგენელი, მათ შორის, ქვეყნის შიგნით, ობიექტური სადამკვირვებლო ორგანიზაციის წარმომადგენელი, რომელიც იტყვის, რომ ეს არჩევნები გაყალბდა. ეს ნიშნავს, რომ ეს არჩევნები შედგა და ის „წითელი ხაზი“, რომელზეც ჩვენ ვსაუბრობთ, დავსვით არა ჩვენ, არამედ - მოქალაქეებმა, რათა მათ არ მოუწიოთ არჩევნებზე 2-ჯერ, 3-ჯერ სიარული და ერთი და იგივე არჩევანის გაკეთება. რაც შეეხება ჩვენი ოპონენტების მიერ გასმულ ხაზს - ესაა ახირებისა და აკვიატების ხასიათის, ვინაიდან, ამის უკან არანაირი არგუმენტი არ დგას. დისკუსიის მიმდინარეობამ და ფასილიტატორების მხრიდან პროფესიონალურმა მიდგომამ გვაჩვენა, რომ მათ დაიწყეს საუბარი იმაზე, თი სად შეიძლებოდა თანხვედრის წერტილების მოძებნა და ვნახეთ, თუ როგორი რეაქცია იყო რიგი პოლიტიკური ორგანიზაციების მხრიდან. როდესაც დაინახეს, რომ შესაძლოა თანხმობა შემდგარიყო, დაიწყეს ისეთი საკითხების წინ წამოწევა, რომელიც არ არსებობს და არ არსებობს ამ საკითხების არგუმენტები. მათი მხრიდან ინფორმაციის გაჟონვით, ელჩებზე თავდასხმით, ოპოზიციური პარტიების წარმომადგენლებზე თავდასხმით ხდება პროცესის დისკრედიტაცია. ჩანს, რომ ოპოზიციის პროპაგანდისტული ნაწილი აგონიაშია გადასული, რადგან იციან, რომ რამდენიმე დღეა პირველ სხდომამდე დარჩენილი და სურთ, ამ აგონიით, რამენაირად, ხელი შეუშალონ შეთანხმებას, - განაცხადა შალვა პაპუაშვილმა.

მმართველი გუნდი ოპოზიციასთან მოლაპარაკებებს აშშ-ის ელჩის რეზიდენციაში 12 ნოემბრიდან მართავს.

ახალარჩეული პარლამენტის პირველი სხდომა 11 დეკემბერს გაიმართება.