არჩილ თალაკვაძე: ვინც საკუთარი მოქალაქეების არჩევანს არ გაითვალისწინებს, ის პოლიტიკურ ფასს გადაიხდის და დარჩება ქუჩაში

ჩვენ ოპოზიციას შევთავაზეთ სამართლიანი პირობები, მაგრამ დესტრუქციულ ნაწილს, რეალურად არ სურს სამართლიანი თამაშის წესები,- ამის შესახებ პარლამენტის თავმჯდომარემ არჩილ თალაკვაძემ „ქრონიკასთან“ საუბრისას განაცხადა.

„ჩვენ შევთავაზეთ ხმების გადათვლა, საგამოძიებო კომისია, ასევე ვთქვით, რომ ნებისმიერი საკითხი, რომელიც არჩევნების სისტემურ პრობლემებზე გაგაჩნიათ, გადავამოწმოთ... მათ არ სურთ ეს. მათ უნდათ რომ მოახდინონ საბოტაჟი დემოკრატიის წინააღმდეგ, თავდასხმა არჩევნებზე, მის შედეგებზე, რის საშუალებასაც ჩვენ არ მივცემთ“, - განაცხადა თალაკვაძემ.

მისი თქმით, საქართველოს პარლამენტი იმუშავებს, თუმცა „ქართული ოცნების“ სურვილი იყო საკანონმდებლო ორგანო ყოფილიყო მრავალპარტიული და იგივე სურდა ჩვენს ორ მილიონამდე თანამოქალაქეს. „ვინც საქართველოს მოქალაქეების სურვილს არ გაითვალისწინებს და ამ ყველაფერს უპასუხებს იგნორირებით, რასაც ჩვენ დღეს ვუყურებთ, რა თქმა უნდა ის პოლიტიკურ ფასს გადაიხდის, დარჩება ქუჩაში და ჩვენს დემოკრატიულ განვითარებას ეს ვერ შეაფერხებს“, - აღნიშნა თალაკვაძემ.

5-მა ოპოზიციურმა პარტიამ დეპუტატის მანდატზე უარის თქმისა და საარჩევნო სიების ჩახსნის შესახებ დოკუმენტები გააფორმა. ოპოზიციის მიერ მომზადებული დოკუმენტების ხელმისმოწერის პროცესს არ დასწრებიან პარტიები: „გირჩი“, „რესპუბლიკური პარტია“ და „ალეკო ელისაშვილი - მოქალაქეები“. „გირჩი“ და "რესპუბლიკური პარტია" აცხადებენ, რომ პარლამენტში არ შედიან და დეპუტატის მანდატზე უარს ამბობენ, უბრალოდ ამის დამადასტურებლად ცერემონიებში მონაწილეობის საჭიროებას ვერ ხედავდნენ.

პროპორციული საარჩევნო სიის ანულირების მოთხოვნით, ცენტრალურ საარჩევნო კომისიას ამ დროისათვის ხუთმა ოპოზიციურმა ძალამ მიმართა, ესენია: „ერთიანი ნაციონალური მოძრაობა - ძალა ერთობაშია”, „ევროპული საქართველო”, „ლეიბორისტული პარტია”, „სტრატეგია აღმაშენებელი” და „ლელო საქართველოსთვის“.