ალეკო ელისაშვილი: პარლამენტში შესვლა ყველას უნდა, მაგრამ იმის ეშინიათ, რა დღეშიც ჩვენ ვართ - ჯვარს გვაცვეს და ტყავი გაგვაძრეს

პარლამენტში შესვლა ყველას უნდა, უბრალოდ, თქმას ვერ ბედავენ. იმის ეშინიათ, რა დღეშიც ერთი კვირაა მე, ლევან იოსელიანი და ჩვენი პარტია ვართ, - ამის შესახებ პარტია „მოქალაქეების“ ერთ-ერთმა ლიდერმა ალეკო ელისაშვილმა „პალიტრანიუსის“ ეთერში განაცხადა.

როგორც ელისაშვილი განმარტავს, „ქართული ოცნება“ შეთანხმებების საფუძველზე იმას თმობს, რაც საქართველოში, მისივე თქმით, 30 წელია სანატრელია. მისივე თქმით, დღეს „პიონერთა სასახლის“ ეზოში რაც მოხდა, ეს არის ხალხის მოტყუება და შეურაცხყოფა.

„ჯვარს გვაცვეს და ტყავი გაგვაძრეს მე, ლევან იოსელიანს და ჩვენს პარტიას. მინდა აგიხსნათ, რასთან გვაქვს საქმე, არანაირი ბანაკი არ მაქვს და ჩემს გარშემო არ ვაგროვებ, უბრალოდ, იდენტური პოზიციები აქვს იმას, ვისაც აქვს სახელმწიფოებრივი დამოკიდებულება პოლიტიკისადმი და ამ ქვეყნისადმი და არეულობა, რევოლუცია ვისაც არ უნდა. მე პარლამენტში ვერავინ დამინახა, არც ლევან იოსელიანი და არც მე იქ არ ვყოფილვართ, ჩვენ მანდატები გვაქვს, ჩვენ იქ არ მივალთ და პარლამენტში არ შევალთ, თუ არ გაფორმდება შეთანხმება მომავალზე. იმ შეთანხმებაზე „ქართულ ოცნებას“ ვათმობინებთ ისეთ რაღაცებს, რაც 30 წელია სანატრელია საქართველოში და რაც მთავარია, მმართველი პარტია ამას თმობს. მე ვარ ცოცხალი მოწმე, ჩემს თვალწინ მიდის ეს პროცესი, მეც ვარ ერთ-ერთი, ვინც ველაპარაკები, ვაწვები „ქართულ ოცნებას“, და ისინი იხევენ უკან, კომპრომისზე მიდიან.

ყველას უნდა პარლამენტში შესვლა, უბრალოდ, თქმას ვერ ბედავენ. იმის ეშინიათ, რა დღეშიც ერთი კვირაა მე, ლევან იოსელიანი და ჩვენი პარტია ვართ. გვლანძღავენ, - მოღალატეები, საზიზღრები ხართო, - მაგრამ ჩვენ რომ დარწმუნებულები ვართ, სახელმწიფოებრივად სწორი პოზიცია გვაქვს და ჩვენ გვწამს, რომ შეთანხმება უნდა გადარჩეს, შეთანხმებას ხელი უნდა მოვაწეროთ, უნდა გვეყოს პასუხისმგებლობა, გამბედაობა და ღირსება, რომ მოვაწეროთ და მერე შევიდეთ პარლამენტში. ჩემზე ამბობდნენ, იქ ვნახავთო, კიდევ ვამბობ, თუ შეთანხმება არ შედგება, ჩვენ პარლამენტში არ შევალთ, არც მე და არც ლევანი.

დღეს რაც მოხდა, „პიონერთა სასახლის“ ეზოში, რაც მოაწყვეს, ეს არის ზუსტად მოტყუება და ხალხის შეურაცხყოფა. რას მოაწერეს ხელი - ჩვენ ვაფორმებთ მემორანდუმს, რომ ვხევთ მანდატებს და არ შევდივართ პარლამენტშიო და ვინ ამბობს ამას - უგულავა, ბოკერია, ბურჯანაძე, ოქრუაშვილი, კუკავა, რომელთაც მანდატები არ აქვთ და ხელი მოაწერეს, მანდატებს ვთმობთო“, - განაცხადა ელისაშვილმა.