ირაკლი კობახიძის თქმით, „ნაცმოძრაობაში“ არიან დეპუტატები, რომლებსაც პარლამენტში შესვლა სურთ, თუმცა ამას პარტიის ლიდერების მხრიდან ​ ბულინგის და შანტაჟის გამო ვერ აკეთებენ

„ნაციონალური მოძრაობის“ შიგნით არის გარკვეული მიმართულებები, რომლებსაც აქვთ პარლამენტში შემოსვლის ინტერესები, უბრალოდ ისინი დღემდე ექვემდებარებიან ბულინგსა და შანტაჟს და საჯაროდაც საუბრობენ ისინი ამაზე, - ამის შესახებ ირაკლი კობახიძემ „ქართული ოცნების“ ოფისში გამართულ ბრიფინგზე განაცხადა. პარტიის აღმასრულებელი მდივნის თქმით, საუბრისთვის სივრცე ამ ვითარებაში კვლავ რჩება.

„არაერთი პოლიტიკური სუბიექტია ამ ბლოკის შიგნით, ასევე კონკრეტული დეპუტატები არიან პარტიის შიგნით, რომლებსაც სურთ პარლამენტში შესვლა, თუმცა ამას ვერ ახერხებენ იმ ბულინგიდან და შანტაჟიდან გამომდინარე, რომელიც ხორციელდება პარტიის ლიდერების მხრიდან - სააკაშვილის, ბოკერიას და გვარამიას მხრიდან სხვადასხვა ფორმით. ეს არის სატელევიზიო შანტაჟი და ბულინგი, სოციალური ქსელების მეშვეობით და ა.შ. ამ ვითარებაში ასეთ პოლიტიკოსებს უჭირთ გადაწყვეტილების მიღება, თუმცა ჩანს, რომ „ნაციონალური მოძრაობის“ შიგნითაც არის გარკვეული სივრცე საუბრისთვის“, - განაცხადა კობახიძემ.

მეათე მოწვევის პარლამენტში შესული რვა ოპოზიციური პარტიიდან, საკანონმდებლო ორგანოს სადეპუტატო უფლებამოსილების შეწყვეტის მოთხოვნით, ხუთმა სუბიექტმა უკვე მიმართა. ამ დროისთვის პარლამენტში შესულია „ნაციონალური მოძრაობისა“ და მის პოლიტიკურ ბლოკში შემავალი სუბიექტების განცხადებებისა და „ევროპული საქართველოს“, „ლელოს“, „სტრატეგია აღმაშენებლისა“ და „ლეიბორისტული პარტიის“ მიმართვები სადეპუტატო უფლებამოსილების შეწყვეტის შესახებ.