შალვა პაპუაშვილი გაზაფხულზე დაანონსებულ აქციებზე: ჩვენი ოპონენტები ელიან, როდის დამძიმდება ქვეყნის მდგომარეობა, რომ ამ დამძიმებული მდგომარეობით მოვიდნენ ხელისუფლებაში

ჩვენი ოპონენტები, ერთის მხრივ, ამბობენ, რომ არ სურთ მანდატი, ღიად აცხადებენ, რომ გაზაფხულს ელოდებიან - პირდაპირ იკითხება, რომ ელიან, როდის დამძიმდება საკუთარი ქვეყნის მდგომარეობა, რომ ამ დამძიმებული მდგომარეობით მოვიდნენ ხელისუფლებაში. სწორედ ამას ნიშნავს გაზაფხულის ლოდინი, - ამის შესახებ ტელეკომპანია „იმედის“ გადაცემაში „არენა“ პარლამენტის წევრმა, შალვა პაპუაშვილმა განაცხადა.

„დეპუტატს აქვს თავისი მანდატი და ის მთლიანად, ქვეყნის წარმომადგენელია. ჩვენი ოპონენტები ხშირად ივიწყებენ, რომ გარდა 8000 ამომრჩევლისა, მეორე მხარეს, არსებობს მილიონი ამომრჩეველი, რომლმაც „ქართულ ოცნებას“ მისცა ხმა. ისინი ამ მილიონ ამომრჩეველს საერთოდ ვერ ხედავენ, მათი თვალები ბრმაა მათ დასანახად. მანდატებზე უარის თქმით, ისინი უარს ეუბნებიან როგორც საკუთარ ამომრჩეველს, ისე - ქვეყანას. 2012 წლიდან მოყოლებული, ისინი ამ არც ერთი ისტორიული მომენტის მონაწილენი არ იყვნენ. ისინი ვერ გახდნენ ასოცირების ხელშეკრულების ხელმოწერის მონაწილეები, რადგან სურდათ, მაშინვე ჩაეშალათ ის, ვერ იყვნენ ვიზალიბერალიზაციის მიღების მონაწილე, რადგან მისი ჩაშლაც სურდათ. 2024 წელს ევროკავშირის წევრობაზე განაცხადის გაკეთება გვინდა და ჩვენი შეთავაზებაც ესაა, რომ გახდნენ ამის მონაწილე და წინ წასწიონ ეს ქვეყანა. ისინი კიდევ ერთ ისტორიულ მომენტს უშვებენ ხელიდან და როგორც ჩვენი ოპონენტების ნაწილმა 8 წელი განვლო იმაში, რომ ეს ქვეყანა ეყანყალებინათ, მოესუსტებინათ ხელისუფლება და მოსულიყვნენ ხელისუფლებაში, სავარაუდოდ, შემდეგი 4 წლის ამისთვის დათმობას აპირებენ“ - განაცხადა შალვა პაპუაშვილმა.

ოპოზიცია და მმართველი გუნდი მოლაპარაკებების მეხუთე რაუნდის მოლოდინში არიან. მხარეები იმედოვნებენ, რომ პოზიციების დაახლოებას შეძლებენ. მიუხედავად იმისა, რომ ხელისუფლების ოპონენტებს ახალი არჩევნები სურთ, „ქართულ ოცნებას“ კი, - შეთანხმება არჩევნების გარეშე. მოლაპარაკებების შუამავალმა ელჩმა მხარეებს მკაფიოდ უთხრა, რომ უნდა გადაწყვიტონ, როგორ მიაღწიონ შეთანხმებას. წინააღმდეგ შემთხვევაში, მეხუთე რაუნდი ეფექტური ვერ იქნება.