ანრი ოხანაშვილი: პარტია თუ უარს ამბობს ამომრჩევლის მიერ დაკისრებული ვალდებულების შესრულებაზე, ეს ნიშნავს საბოტაჟს და არა პოლიტიკურ ბოიკოტს

„ოპონენტები ცდილობენ, სახელმწიფო დაფინანსებასთან დაკავშირებულ ცვლილებებზე არასწორი ინფორმაცია გაავრცელონ“, - ამის შესახებ პარლამენტში, რიგგარეშე სესიაზე, იურიდიული კომიტეტის თავმჯდომარე ანრი ოხანაშვილმა განაცხადა.

მისი თქმით, დემოკრატიის პრინციპის თანახმად, სახელმწიფო ხელისუფლების წყარო არის ხალხი და ხალხი თავის ძალაუფლებას ახორციელებს საკუთარი წარმომადგენლების მეშვეობით.

„თუმცა, უნდა ჰქონდეს თუ არა პოლიტიკურ პარტიას, რომელიც საბოტაჟს უცხადებს საკუთარ ამომრჩეველს, საბოტაჟს უცხადებს დემოკრატიის პრინციპს, პარლამენტს, როგორც კონსტიტუციურ ორგანოს, ამ შემთხვევაში რამდენად მიზნობრივია, რომ რომელიმე პოლიტიკური პარტია ბიუჯეტიდან იღებდეს დაფინანსებას? ჩვენი კანონპროექტით ვამბობთ, რომ ეს არ იქნება მიზნობრივი, ვინაიდან მიზნობრიობა დაკავშირებულია დემოკრატიის პრინციპთან, რაც ნიშნავს, რომ როდესაც ამომრჩეველმა გააკეთა არჩევანი და კონკრეტულ პარტიას მისცა ერთი ხმა, ერთი ნამდვილი ხმა უდრის 15 ლარს, ეს ნიშნავს, რომ კონკრეტულმა ამომრჩეველმა ასევე გადასცა დაფინანსება, ერთი ნამდვილი ხმა 15 ლარის ოდენობით კონკრეტულ პარტიას.

თუ რომელიმე პარტია უარს ამბობს იმ მინიმალურ სტანდარტზე, უარს ამბობს იმ ვალდებულების შესრულებაზე, რომელიც დააკისრა ამომრჩეველმა და დემოკრატიის პრინციპმა, ამ შემთხვევაში ეს ნიშნავს საბოტაჟს და არა პოლიტიკურ ბოიკოტს, როგორც სურთ ოპონენტებს გააფორმონ და გაასაღონ საზოგადოებაში, ვითომ ისინი იმყოფებიან პოლიტიკურ ბოიკოტში. უნდა გაივლოს წითელი ხაზი, სად იწყება პოლიტიკური ბოიკოტი და სადამდეა ამომრჩევლის და პარლამენტის საბოტაჟი“, – განაცხადა ანრი ოხანაშვილმა.

პარტიების დაფინანსებასთან დაკავშირებულ კანონპროექტს პარლამენტის რიგგარეშე პლენარულ სესიაზე პირველი მოსმენით განიხილავენ. კანონპროექტის ავტორი და ინიციატორები არიან დეპუტატები: ანრი ოხანაშვილი, ირაკლი ქადაგიშვილი, გურამ მაჭარაშვილი, რატი იონათამიშვილი და დავით მათიკაშვილი.