აკაკი ბობოხიძე: „გირჩის“ ნაწილს და „მოქალაქეებს“ მოვუწოდებ, ილაპარაკონ არა პარლამენტში შესვლაზე, არამედ იმაზე, გამოვლენ თუ არა პარლამენტიდან

„ევროპული საქართველოს“ წევრი, აკაკი ბობოხიძე ეხმაურება “ქართული ოცნების“ ინიციატივას ოპოზიციური პარტიებისათვის საბიუჯეტო დაფინასების მოხსნაზე. ბობოხიძის თქმით, ამით პოლიტიკურ პარტიებს ურთულდებათ არსებობა, თუმცა ეს ნაბიჯი მომავალში ეფექტურად იქნება გამოყენებული „ქართული ოცნების“ წინააღმდეგ.

ჟურნალისტის კითხვაზე, შეაცვლევინებს თუ არა ეს ინიციატივა ოპოზიციურ პარტიებს გადაწყვეტილებას პარლამენტში არშესვლასთან დაკავშირებით, ბობოხიძემ აღნიშნა, რომ დღეს საკითხი დგას არა პარლამენტში შესვლასთან, არამედ პარლამენტიდან გამოსვლასთან დაკავშირებით.

„პარტიებს ცხოვრება გვირთულდება, მაგრამ ვფიქრობ, რომ ეს იქნება ნაბიჯი, რომელიც ეფექტურად იქნება გამოყენებული „ქართული ოცნების“ წინააღმდეგ მომავალში. არ ველოდები, რომ ამაზე იქნება რომელიმე პარტიის გადაწყვეტილება დამოკიდებული, თუ რომელიმე პარტია მაინც გადაწყვეტს და არიან პიროვნებები, ვინც რჩებიან პარლამენტში და რაც არ უნდა იძახონ ახლა, რომ პარლამენტში არ შედიან, პარლამენტში შესვლა-არშესვლის საკითხი არ დგას, პარლამენტიდან გამოსლის საკითხი დგას, ამიტომ, მე „გირჩის“ ნაწილს და პარტია „მოქალაქეებს“ მოვუწოდებ, რომ პარლამენტში შესვლაზე კი ნუ ილაპარაკებენ, ილაპარაკონ იმაზე, გამოვლენ თუ არა პარლამენტიდან, რადგან პარლამენტში არიან ყველანი, მათ შორის ის ადამიანებიც, ვინც უარს აცხადებენ მანდატზე მანამ, სანამ მანდატებს არ მოხსნის „ქართული ოცნება“, - განაცხადა ბობოხიძემ.

პარლამენტმა პირველი მოსმენით მიიღო საკანონმდებლო პაკეტი, რომლის მიხედვით, სახელმწიფო ბიუჯეტიდან თანხას მიიღებს მხოლოდ ის პარტია, რომელიც მისთვის განკუთვნილ პარლამენტის წევრის მანდატს ან მანდატების ნახევარს მაინც აითვისებს.