ანრი ოხანაშვილი: საბოტაჟის გზა ვერავის მისცემს საშუალებას ბიუჯეტიდან პარტიებისთვის გამოყოფილი სუბსიდირება არამიზნობრივად გამოიყენოს

არჩევნებამდეც და არჩევნების შემდეგაც მოქმედებს საქართველოს კონსტიტუცია, რომელიც განამტკიცებს დემოკრატიის პრინციპს. დემოკრატიის პრინციპი ნიშნავს ხალხის ნების წარმომადგენლობას და წარმომადგენლობის რეალიზებას. კონსტიტუცია არის ფუნდამენტი, ჩვენი ქვეყნის უზენაესი კანონი და როდესაც ამ პრინციპის საწინააღმდეგოდ მოქმედებს პარტია იქ საუბარი ისეთ იურიდიულ ნიუანსებზე, როგორიც არის უკუძალის საკითხი, რა თქმა უდნა, აღარ დაისმის, - ამის შესახებ პარლამენტის იურიდიული კომიტეტის თავმჯდომარემ, ანრი ოხანაშვილმა „ღია ეთერში“ ისაუბრა.

„ეს დაფინანსება ჯერ არავის არ უწყდება და არ უჩერდება. დეპუტატებსა და პარტიებს ექნებათ შესაძლებლობა გააკეთონ არჩევანი, რჩებიან პოლიტიკურ სივრცეში, თუნდაც პოლიტიკური ბოიკოტის სივრცეში და გარკვეულ გადაწყვეტილებებს ახორციელებენ დემოკრატიულ სივრცეში, ან ირჩევენ საბოტაჟის გზას. საბოტაჟის გზა ვერავის მისცემს საშუალებას , რომ ის სუბსიდირება, რომელიც არის ბიუჯეტიდან პარტიებისთვის წახალისება, სტიმულირება და დაფინანსება არამიზნობრივად იქნას გამოყენებული“, – განაცხადა ანრი ოხანაშვილმა.

მან ასევე განმარტა სად გადის წითელი ხაზი პოლიტიკურ ბოიკოტსა და საბოტაჟს შორის.

„როდესაც ელემენტარულ დემოკრატიულ პრინციპს, ხალხის ნების რეალიზებაზე კონკრეტული პარტია უარს ამბობს და ეს რეალიზება არ ნიშნავს აპრიორი კანონშემოქმედებით საქმიანობას, პარლამენტში სიარულს. პარლამენტის წევრს აქვს შესაძლებლობა, რომს საკუთარი ამომრჩევლის ნება ბევრი სხვა ფორმით განახორციელოს. კანონშემოქმედებითი საქმიანობა არის ერთ-ერთი ერთ ერთ ელემენტი საპარლამენტო უფლებამოსილების განხორციელების, ჩვენ ამას არავის არ ვაიძულებთ. აქ საუბარია დემოკრატიულ პრინციპზე, ხალხის ნების რეალიზებაზე, რაც კონსტიტუციით აკისრია ყველა პოლიტიკურ პარტიას“, განაცხადა ოხანაშვილმა.