მაია ცქიტიშვილი: პარტიების დაფინანსების შესახებ კანონპროექტი შემდგომი შეფასებისთვის გაიგზავნება როგორც ვენეციის კომისიაში, ისე - „ოდირში“

პარტიების დაფინანსების შესახებ კანონპროექტი შემდგომი შეფასებისთვის გაიგზავნება როგორც ვენეციის კომისიაში, ისე - „ოდირში“, - ამის შესახებ რეგიონული განვითარებისა და ინფრასტრუქტურის მინისტრობის კანდიდატმა, მაია ცქიტიშვილმა „იმედის“ გადაცემა „ღია ეთერში“ განაცხადა.

მისი თქმით, პარტიებს გარდა სახელმწიფო დაფინანსებისა აქვთ საკუთარი დაფინანსება, რასაც შემომწირველებისა და პარტიის წევრებისგან ან მათი ამომრჩევლებისგან იღებენ.

„როდესაც ვსაუბრობთ იმაზე, რომ პარლამენტში ყოფნა და დეპუტატის მანდატი სამსახურია, ისევე, როგორც პარტიის მხრიდან ეს არის პასუხისმგებლობა და ტვირთი, როდესაც ასევე ვიაზრებთ, რომ აქ ჩვენ საუბარი გვაქვს სახელმწიფო დაფინანსებაზე, რაც გადამხდელების მიერ გადახდილი გადასახადები და პარტიების დაფინანსებაა. შესაბამისად, პარტია იღებს დაფინანსებას იმისთვის, რომ ის ასრულებს თავის მოვალეობას და იღებს პასუხისმგებლობას ამომრჩევლის წინაშე. ამისთვის იხდის გადასახადის გადამხდელი იმ დაფინანსებას. აქვე, არ უნდა დაგვავიწყდეს, რომ ამ დროს, პარტიებს აქვთ საკუთარი დაფინანსება, რასაც შემომწირველებისგან და მათი პარტიის წევრებისგან, ან პარტიის ამომრჩევლებისგან იღებენ, მაგრამ როდესაც სახელმწიფო დაფინანსებაზეა საუბარი, რა თქმა უნდა, უნდა ვისაუბროთ იმ პასუხისმგებლობაზე, რაც ჩვენ ყველას ერთობლივად გვაკისრია, მათ შორის ჩვენი ბიუჯეტის ეფექტიანად მართვაზე. რა თქმა უნდა, შეუძლებელია, ვისაუბროთ იმაზე, რომ როდესაც ადამიანი თუ პარტია უარს აცხადებს პასუხისმგებლობისა და ტვირთის ტარებაზე, ამას მოჰყვეს შესაბამისი დაფინანსება. ამდენად, პირველ რიგში უნდა, აქცენტი უნდა გაკეთდეს ამ გადაწყვეტილების შინაარსზე. დაფინანსების შესახებ კანონპროექტი შემდგომი შეფასებისთვის გაიგზავნება როგორც ვენეციის კომისიაში, ისე - „ოდირში“. არავის გვეპარება ეჭვი ამ ორგანიზაციების კომპეტენტურობასა და ობიექტურობაში. მათი შენიშვნები და რეკომენდაციებიც მოვისმინოთ. „ქართული ოცნებისა“ და პარლამენტის ხედვა პარტიების დაფინანსების შესახებ გაივლის შესაბამის ექსპერტიზას ვენეციის კომისიაში, სადაც ჩვენმა კონსტიტუციამ გაიარა შესაბამისი ექსპერტიზა, ვიდრე საკონსტიტუციო ცვლილებებს მივიღებდით“, - განაცხადა მაია ცქტიშვილმა.

პარლამენტმა პარტიების დაფინანსებასთან დაკავშირებული ცვლილებები პირველი მოსმენით დაამტკიცა. პროექტის მიხედვით, სახელმწიფო ბიუჯეტიდან თანხას მიიღებს მხოლოდ ის პარტია, რომელიც მისთვის განკუთვნილ პარლამენტის წევრის მანდატს ან მანდატების ნახევარს მაინც აითვისებს. შესაბამისი ცვლილებები „მოქალაქეთა პოლიტიკური გაერთიანებების შესახებ“ კანონში შედის, რომელსაც პარლამენტი დაჩქარებული წესით განიხილავს და მიმდინარე კვირის ბოლოს დაამტკიცებს.

კანონპროექტში აღნიშნულია, რომ პარტია მომავალი წლის საბიუჯეტო დაფინანსებას ვერ მიიღებს, თუ მისი წარდგენით არჩეულ პარლამენტის წევრთა ნახევარი მაინც, არასაპატიო მიზეზით გააცდენს მიმდინარე მოწვევის პარლამენტის წინა წლის ყველა პლენარულ სხდომას.