ალექსანდრე რაქვიაშვილი: თუ მოლაპარაკებებზე საარჩევნო ცვლილებებზე შევთანხმდებით, ოპოზიციას პარლამენტში შესვლისკენ მოვუწოდებთ

„ჩვენთვის რიგგარეშე არჩევნები არასდროს არ იყო მთავარი მოთხოვნა. ჩვენ ამ მოთხოვნას შევუერთდით, რომ მხარი დავუჭიროთ ჩვენს პარტნიორებს და ერთიანი პოზიცია ჩამოვაყალიბოთ“, - ამის შესახებ „რუსთავი2“-ის ეთერში „გირჩის“ ერთ-ერთმა ლიდერმა ალექსანდრე რაქვიაშვილმა განაცხადა.

„ჩვენთვის უფრო მნიშვნელოვანი იყო და ამაში პარტნიორები გვიჭერდნენ მხარს, რომ შეგვეცვალა საარჩევნო სისტემა. თუ ჩვენ მივიღებთ მოლაპარაკების შედეგად ასეთ ცვლილებებს, ჩვენ მოვუწოდებთ ჩვენს კოლეგებს ოპოზიციიდან, რომ შევიდეთ პარლამენტში და ერთად ვიმუშაოთ. მაგრამ თუ ეს მოხდება და მიუხედავად ჩვენი მცდელობისა და მოწოდებებისა, ოპოზიცია არ შევა პარლამენტში, მაშინ ჩვენც არ შევალთ იქ, იმიტომ, რომ აზრი არ ექნება“, - განაცხადა ალექსანდრე რაქვიაშვილმა.

ოპოზიცია და მმართველი გუნდი მოლაპარაკებების მეხუთე რაუნდის მოლოდინში არიან. მხარეები იმედოვნებენ, რომ პოზიციების დაახლოებას შეძლებენ. მიუხედავად იმისა, რომ ხელისუფლების ოპონენტებს ახალი არჩევნები სურთ, „ქართულ ოცნებას“ კი - შეთანხმება არჩევნების გარეშე. მოლაპარაკებების შუამავალმა ელჩმა მხარეებს მკაფიოდ უთხრა, რომ უნდა გადაწყვიტონ, როგორ მიაღწიონ შეთანხმებას. წინააღმდეგ შემთხვევაში, მეხუთე რაუნდი ეფექტური ვერ იქნება.