ზაალ უდუმაშვილი: ნინო ანანიაშვილის ქმედება ყოვლად მიუღებელია - როცა საუბარია ოკუპანტზე, კულტურაც და სპორტიც პოლიტიკაა

„ნაციონალური მოძრაობის“ წარმომადგენლის, ზაალ უდუმაშვილის განცხადებით, მიუღებელია, რომ პრიმა ბალერინა, ნინო ანანიაშვილი რუსეთში, ნოვოსიბირსკის ბალეტს უხელმძღვანელებს. როგორც უდუმაშვილმა ტელეკომპანია „პალიტრანიუსის“ ეთერში განაცხადა, როდესაც საუბარი ოკუპანტ ქვეყანაზეა, ყველაფერი - კულტურაცა და სპორტიც, პოლიტიკაა.

„ჩემთვისაც სიურპრიზი იყო, როდესაც ეს ინფორმაცია გავიგე. ნამდვილად ვერაფრით გავამართლებ, მიუხედავად იმისა, რომ პირადად ვიცნობ ნინო ანანიაშვილს და ვთვლი, რომ მსოფლიოში ერთ-ერთი საუკეთესო ბალერინაა. ეს ქმედება ყოვლად მიუღებელია და ვერ გავამართლებ. როდესაც საუბარია იმაზე, რომ არ შეიძლება პოლიტიკისა და კულტურის არევა, როდესაც საუბარია ოკუპანტ ქვეყანაზე, როდესაც შენი ქვეყნის ტერიტორიები აქვს ოკუპირებული და განაგრძობს ოკუპაციას, აქ პოლიტიკაც, კულტურაც და სპორტიც - ყველაფერი პოლიტიკაა“,- განაცხადა უდუმაშვილმა.

ნინო ანანიაშვილი რუსეთში, ნოვოსიბირსკის ოპერისა და ბალეტის თეატრის საბალეტო დასს უხელმძღვანელებს.