შალვა პაპუაშვილი „სამართლიან არჩევნებს“ წაყენებულ ბრალდებებზე განმარტების გაკეთებას სთხოვს

საქართველოს პარლამენტის წევრმა „ქართული ოცნებიდან“, განათლების, მეცნიერებისა და კულტურის კომიტეტის თავმჯდომარის პირველმა მოადგილე შალვა პაპუაშვილმა Facebook-ზე გამოაქვეყნა პოსტი, სადაც „სამართლიან არჩევნებს“ (ISFED) რამდენიმე საკითხზე განმარტებას გაკეთებისკენ მოუწოდებს.

„ამასობაში, უკვე ერთი თვე გავიდა მას შემდეგ, რაც სამართლიანი არჩევნები (ISFED)-ის მიერ მისი შეცდომის (პარალელური დათვლის შედეგები) დაგვიანებული აღიარების შემდეგ, საჯაროდ ვთხოვეთ, ჩვენთვის და საზოგადოებისთვის განემარტათ მათ მიერ წაყენებული ბრალდება, თითქოს უბნების 8%-ში იყო მეტობით დისბალანსი (რაც აბსურდია) და დაესახელებინათ კონკრეტული თარიღები“, - წერს პაპუაშვილი.

დეპუტატი ითხოვს განმარტებას: კერძოდ, რომელ რიცხვში დაუკავშირდა ეუთო/ოდირის ექსპერტი? რომელ რიცხვში დაიწყო აუდიტი? რომელ რიცხვში მიხვდა ISFED-ის თავმჯდომარე, რომ პროგრამაში იყო ბათილი ბიულეტენების მითვლის ხარვეზი?

„ISFED-ი ამ დრომდე ჯიუტად დუმს. სამწუხაროდ, "სამართლიანმა არჩევნებმა", ბოლო ორი თვის განმავლობაში, ვერც გამჭვირვალობის და ვერც ანგარიშვალდებულების მინიმალური სტანდარტი ვერ დააკმაყოფილა და ამით მოახდინა მისი, როგორც ანგარიშგასაწევი ორგანიზაციის, დისკვალიფიკაცია“, - წერს პაპუაშვილი.

2020 წლის 24 დეკემბერს ელენე ნიჟარაძემ „სამართლიანი არჩევნების“ აღმასრულებელი დირექტორის თანამდებობა დატოვა.

„სამართლიანმა არჩევნებმა“ (ISFED) 2020 წლის 31 ოქტომბრის არჩევნების საბოლოო შედეგების დაზუსტებულ ინფორმაცია გამოაქვეყნა. სამართლიანი არჩევნებისა და დემოკრატიის საერთაშორისო საზოგადოება განმარტავს, რომ 31 ოქტომბრის არჩევნების პარალელური დათვლის შიდა აუდიტის შედეგებმა დაადასტურა PVT მეთოდოლოგის სიზუსტე და დამკვირვებლების მიერ მოწოდებული ინფორმაციის სანდოობა, თუმცა, გამოვლინდა ხარვეზი საარჩევნო სუბიექტების მიერ მიღებული ხმების გამოსათვლელ ფორმულაში. კერძოდ, საარჩევნო სუბიექტების მიერ მიღებულ ხმებთან ერთად, დაითვალეს ბათილი ბიულეტენებიც, რისი გასწორების შედეგადაც საარჩევნო სუბიექტების მიერ მიღებული ხმების პროცენტული რაოდენობა უმნიშვნელოდ შეიცვალა.