ნარმანია კალაძეს თბილისის მერობის ღირსეულ კანდიდატს უწოდებს

დედაქალაქის მერმა დავით ნარმანიამ, “ქართული ოცნების“ თბილისის მერობის კანდიდატის წარდგენის ცერემონიის დასრულების შემდეგ, კახა კალაძეზე ჟურნალისტებთან განცხადება გააკეთა. 

“თბილისის მერის პოსტი ძალიან საპასუხისმგებლო და მნიშვნელოვანი პოზიციაა. ჩვენმა გუნდმა ძალიან ღირსეული კანდიდატი წარადგინა კახი კალაძის სახით, რომელიც გააგრძელებს იმ მდგრად განვითარებასთან დაკავშირებულ მნიშვნელოვან საკითხებს, რომლებიც ჩვენმა გუნდმა დაიწყო ჩვენს ქალაქში და ის დაძლევს იმ უამრავ გამოწვევას, რომლის წინაშეც ქალაქი მუდამ დგას ხოლმე. დარწმუნებული ვარ, რომ ეს იქნება წარმატებული მერი და მას ექნება ყველას მხარდაჭერა და მათ შორის, მე ვადასტურებ ჩემს ძალიან დიდი მხარდაჭერას მისი კანდიდატურის მიმართ. ის არის ჩემი მეგობარი და მიხარია, რომ ჩემი მეგობარი და ჩვენი გუნდის ღირსეული წარმომადგენელი დასახელდა მერობის კანდიდატად“, - განაცხადა ნარმანიამ. 

თბილისის მოქმედმა მერმა ჟურნალისტებთან საუბრისას მისი მერობის პერიოდიც შეაფასა. 

“მიუხედავად უამრავი წინააღმდეგობისა და საბოტაჟისა, რომელიც განსაკუთრებით თავდაპირველ ეტაპზე იყო ჩვენ ძალიან ბევრი რამ მოვახერხეთ: ავაშენეთ ახალი საბავშვო ბაღები და 15-მდე აშენებული ახალი საბავშვო ბაღი მნიშვნელოვანი პროგრესია ჩვენი დედაქალაქისთვის, ახალი გზები, რომლებიც ჩვენ ავაშენეთ, განახლებული აღმაშენებლის გამზირი, ახალი ავტობუსები, ეს მხოლოდ მცირედი ჩამონათვალია იმ პროექტებისა რომლებიც ჩვენ თბილისში განვახორციელეთ. ვმუშაობდით დღე და ღამე იმისათვის, რომ უკეთესი პირობები შეგვექმნა ჩვენი თანამოქალაქეებისთვის და ქალაქში ცხოვრება ყოფილიყო უფრო მეტად კომფორტული. ბუნებრივია, რესურსები შეზღუდულია, არსებული რესურსების პირობებში ჩვენ მაქსიმალურს ვეცადეთ, რომ გვქონოდა მეტი რესურსი მეტს გავაკეთებდით მაგრამ მნიშვნელოვანია ის, რომ პროგრამები და პროექტები რომლებიც ინიცირებულია გაგრძელდება და ჩვენს ქალაქში უკეთესი პირობები იქნება“, - განაცხადა ნარმანიამ. 

თავის მხრივ კახა კალაძეც მადლობას უხდის მოქმედ მერს. მისი შეფასებით, დღემდე დედაქალაქისთვის არაერთი მნიშვნელოვანი საქმე გაკეთდა.

"არაერთი მნიშვნელოვანი საქმე გაკეთდა, მაგრამ საზოგადოება ვითარდება და ჩვენც ბევრად უფრო მეტი გვინდა” , - განაცხადა კახა კალაძემ. 

"ქართულმა ოცნებამ" თბილისის მერობის კანდიდატი კახი კალაძე დღეს ოფიციალურად წარადგინა. წარდგენის ცერემონია მრაწმინდაზე შედგა. კახი კალაძის საარჩევნო სლოგანი "ჩემი ოცნების თბილისი" იქნება.