ალეკო ელისაშვილი: თუ „ქართული ოცნება“ ხელს მოაწერს იმას, რასაც ჩვენ ვითხოვთ, მე და ლევან იოსელიანი შევალთ პარლამენტში

ჩვენი პარტიის პოზიციაა, რომ, შესაძლოა მეხუთე რაუნდის გარეშეც, მაგრამ ელჩების თანდასწრებით, თუ „ქართული ოცნება“ ხელს მოაწერს იმას, რასაც ჩვენ ვითხოვთ - პოლიტპატიმრების გათავისუფლებას, ელექტრონულ არჩევნებს, საარჩევნო კანონმდებლობისა და ადმინისტრაციის ცვლილებას - მე და ლევან იოსელიანი შევალთ პარლამენტში, - ამის შესახებ „პალიტრანიუსის“ ეთერში პარტია „მოქალაქეების“ ლიდერმა, ალეკო ელისაშვილმა განაცხადა.

„ძალიან უსასრულოდ გაიწელა მეხუთე რაუნდი და არ ვიცით, როდის იქნება. ამასობაში თავზე დაგვემხო ქვეყანა. ჩვენ, მე და ლევან იოსელიანი, გადაწყვეტილებებს ვიღებთ დამოუკიდებლად. არავის ვეკითხებით - არც ივანიშვილს, არც სააკაშვილს და მითუმეტეს, არც ბოკერიას. ჩვენ გვსურს, კონსულტაციები გავმართოთ ოპოზიციაში ყველასთან, ვისაც აქვს პასუხისმგებლობა და გაბედულობა, რომ მიიღოს თამამი გადაწყვეტილება. ჩვენი პარტიის პოზიციაა, რომ, შესაძლოა მეხუთე რაუნდის გარეშეც, მაგრამ ელჩების თანდასწრებით, თუ „ქართული ოცნება“ ხელს მოაწერს იმას, რასაც ჩვენ ვითხოვთ - პოლიტპატიმრების გათავისუფლებას, ელექტრონულ არჩევნებს, საარჩევნო კანონმდებლობისა და ადმინისტრაციის ცვლილებას - მე და ლევან იოსელიანი შევალთ პარლამენტში. თუ თვითმმართველობის არჩევნებზე ჩვენ ჯამური ხმებით „ქართულ ოცნებას“ ვაჯობებთ, ეს იყოს პლებისციტი - ეს ძალიან კარგი იდეაა. გიგა ბოკერიას აზრი არ გვაინტერესებს, იმიტომ რომ უმანდატო ხალხთან ლაპარაკს აზრი არ აქვს. დანარჩენების აზრი, მათ შორის „ნაცმოძრაობის“ აზრიც გვაინტერესებს, იმიტომ რომ, ჩემი ინფორმაციით, არც იქ არის ერთსულოვნება ამ საკითხზე“, - განაცხადა ელისაშვილმა.