მამუკა მდინარაძე დავით გარეჯზე: როგორც ჩანს, ვიღაცამ ამ მიწების გადაცემის ვალდებულება აიღო

როგორც ჩანს, ვიღაცამ, და ეს ვერ იქნება ივერი მელაშვილი, ამ მიწების გადაცემის ვალდებულება აიღო და ამის ფარგლებში ხდება ის, რასაც მათი ტელევიზიების ეთერში ვხედავთ. მთავარი აქტორი არის არა ივერი მელაშვილი, არამედ მაღალი თანამდებობის პირები. ამაში მე, როგორც რიგითი მოქალაქე, მყარად ვარ დარწმუნებული, - ამის შესახებ ტელეკომპანია „იმედის“ გადაცემაში „დღის ქრონიკა“ ფრაქცია „ქართული ოცნების“ თავმჯდომარემ, მამუკა მდინარაძემ განაცხადა.

„ჩემი ინფორმაციით, ივერი მელაშვილი ახლა არის ჩასული დავით გარეჯში და იქ ამბობს, რომ ის რუკები, რაზეც გამოძიება საუბრობს, არარელევანტურია. მე დღეს ვთქვი, რომ დაცვის სტრატეგია, რომლის მიხედვითაც დავით გარეჯი არაა საქართველო, არის მოღალატეობრივი. მინდა განვმარტო, რას ვგულისხმობდი - მელაშვილი და მისი შემკვეთები, ვინც დღეს მას ასე ლაპარაკს უკვეთავს, არიან მოღალატეები. მე მოვუწოდებ მელაშვილს, არ აჰყვეს ვიღაცის ამგვარ ქმედებებს, იმიტომ რომ აქ უფრო დიდი, მოღალატეობრივი ამბავი ჩანს. ბოლო პერიოდში ასეთი დონის გაუგონარი რამ „ნაცმოძრაობისგანაც“ კი ვერ წარმოგვედგინა. ჩემი, როგორც რიგითი მოქალაქის ვარაუდით, ეს არის თავის დროზე დაგეგმილი ერთი კონკრეტული დანაშაულებრივი ქმედება, რომლის მიხედვითაც დავით გარეჯის კომპლექსის ძალიან მნიშვნელოვანი ნაწილი შეგნებულად უნდა გადაეცათ და დღესაც ცდილობენ ამის „გაპრავებას“. როდესაც ეს ადამიანი გამოვიდა, მან მაშინვე თქვა, რომ გარეჯი არაა საქართველო და რაც შენი არაა, შენი ვერ იქნება - აბსოლუტურად გაუგონარი სიტყვები, რაც არ ჯდება საქართველოს ინტერესებში. არსებობს კონკრეტული დოკუმენტები და მტკიცებულებები, რომლებიც ადასტურებენ 3500 ჰექტარის გადაცემის მცდელობას. არა მხოლოდ ისტორიულად ან ლოზუნგის დონეზე, არამედ მტკიცებულებების დონეზე - საქართველო და აზერბაიჯანი შეთანხმდნენ, რომ შესაბამისი რუკებით უნდა ეხელმძღვანელათ საზღვრის დადგენისას. ეს რუკები იყო ხელმისაწვდომი მათთვის და არ გამოიყენეს. ბოლო 24 საათის მოვლენების მიხედვით, ივერი მელაშვილი არის ერთ-ერთი მცირე აქტორი ამ პროცესში. ადამიანთა ძალიან დიდი ჯგუფი ცდილობს რუკების გაუფასურებას. მთელი მათი პარტაქტივი დარაზმულია, რომ ეს რუკები და მტკიცებულებები „გააბანძონ“, რომელთა უტყუარობაში ეჭვის შეტანა შეუძლებელია. როგორც ჩანს, ვიღაცამ, და ეს ვერ იქნება ივერი მელაშვილი, ამ მიწების გადაცემის ვალდებულება აიღო და ამის ფარგლებში ხდება ის, რასაც მათი ტელევიზიების ეთერში ვხედავთ. მთავარი აქტორი არის არა ივერი მელაშვილი, არამედ მაღალი თანამდებობის პირები. ამაში მე, როგორც რიგითი მოქალაქე, მყარად ვარ დარწმუნებული“, - განაცხადა მდინარაძემ.

28 იანვარს, ივერი მელაშვილი და ნატალია ილიჩოვა სასამართლო დარბაზიდანვე გათავისუფლდნენ. მათ სასამართლომ გირაო შეუფარდა.

13 იანვარს პროკურატურამ დავით გარეჯის საქმეზე ბრალდებულების, ნატალია ილიჩოვასა​ და ივერი მელაშვილის მიმართ გამოძიება დაასრულა, საქმის არსებითი განხილვა უკვე სასამართლოში გაგრძელდება. 21 იანვარს პროკურატურამ ამავე საქმეზე მოპოვებული ფარული ვიდეო- და აუდიოჩანაწერები გამოაქვეყნა.