მამუკა მდინარაძე: „ნაცმოძრაობას“ და მისი კლასტერის ლიდერებს თუ დასჭირდათ, იმასაც იტყვიან, რომ რუსეთი ოკუპანტი არ არის

პოლიტიკური თავხედობაა, როდესაც გჭირდება და ამბობ, რომ გარეჯის ნაწილი საქართველო არ არის, - ამის შესახებ ფრაქცია „ქართული ოცნების“ თავმჯდომარემ პოლიტსაბჭოს სხდომის დასრულების შემდეგ ჟურნალისტებს განუცხადა.

მამუკა მდინარაძის თქმით, ხელისუფლების ოპონენტებმა ეროვნული ინტერესების საწინააღმდეგო განცხადებები არ უნდა გააკეთონ.

„ნაცმოძრაობის“ და მისი კლასტერის ლიდერები, მათი განცხადებებიდან გამომდინარე ვამბობ, თუ დასჭირდათ იმასაც იტყვიან, რომ რუსეთი ოკუპანტი არ არის. უკვე ამ დონის განცხადებებს აკეთებენ. პოლიტიკური თავხედობაა, როდესაც გჭირდება რაღაცაში და გარეჯის ნაწილზე ამბობ, რომ ის საქართველოს ტერიტორია არ არის. ჩემი აზრით, ასეთი განცხადებების გაკეთება სირცხვილი უნდა იყოს. ვგულისხმობ პოლიტიკური პარტიების ლიდერებს, რომლებიც ასე თავხედურად და მტრულად საქართველოს ეროვნული ინტერესების საწინააღმდეგოდ აცხადებენ, რომ გარეჯის ნაწილი საქართველო არ არის.

არაფერ შუაში არ არის სხვა წლების დასახელება, მაშინ როდესაც 90-იანის წლების მეორე ნახევარში საქართველომ და მისმა მეგობარმა, მისმა პარტნიორმა ქვეყანამ აზერბაიჯანმა ხელი მოაწერეს შეთანხმებას, სადაც შავით თეთრზე წერია, რომ საზღვრების დადგენა უნდა მოხდეს 1938 წლის რუკის შესაბამისად. ჩვენ გვაქვს მტკიცებულება, რომელიც მოიცავს ერთის მხრივ, ხელმოწერილ ბოლოდროინდელ შეთანხმებას და ამ შეთანხმებაში ჩაწერილ პირობას, რომ 38 წლის რუკით უნდა ვისარგებლოთ, ამის საწინააღმდეგოდ წასვლა არის მტრული“, - განაცხადა მამუკა მდინარაძემ.

დღეს გამართულ ბრიფინგზე საპარლამენტო უმრავლესობის წევრმა, მიხეილ სარჯველაზემ განაცხადა, რომ „ერთიანი ნაციონალური მოძრაობა“ და მისი სრული გავლენის ქვეშ მოქმედი სხვა პოლიტიკური პარტიები ებრძვიან თავიანთ სამშობლოსა და ისტორიას, რათა ჩამოაყალიბონ ხალხის იმგვარი პოლიტიკური ნება, რომელიც როგორმე ბოლომე მიიყვანს საქართველოს კუთვნილი, ძირძველი მიწების სხვა სახელმწიფოსთვის გადაცემის წლების წინ ჩაფიქრებულ გეგმას.

„როგორ არის შენი, როდესაც არ არის შენი. არ გაქვს ამის საფუძველი და ვიღაცის იქ, უკაცრავად და, ბერი იქნება თუ ერის წარმომადგენელი იქნება, თუ ზოგი მივა და კელიებთან პოზირებას დაიწყებს, ამის გამო ეუბნები, რომ ჩემია. არ არის სწორი, არ არის შენი“, - ამის შესახებ დავით გარეჯის საქმეზე ბრალდებულმა ივერი მელაშვილმა 28 მარტს, „ტვ პირველის“ ეთერში განაცხადა.

ივერი მელაშვილი და ნატალია ილიჩოვა სასამართლო დარბაზიდანვე გათავისუფლდნენ. მათ სასამართლომ გირაო შეუფარდა.

13 იანვარს პროკურატურამ დავით გარეჯის საქმეზე ბრალდებულების, ნატალია ილიჩოვასა​ და ივერი მელაშვილის მიმართ გამოძიება დაასრულა, საქმის არსებითი განხილვა უკვე სასამართლოში გაგრძელდება. 21 იანვარს პროკურატურამ ამავე საქმეზე მოპოვებული ფარული ვიდეო- და აუდიოჩანაწერები გამოაქვეყნა.