ანრი ოხანაშვილი ნარკოტიკული საშუალებების დოზებთან დაკავშირებულ ცვლილებებზე: ადამიანზე მორგებული პოლიტიკის თვალსაზრისით, ეს წინ გადადგმული ნაბიჯია

„ნარკოტიკული საშუალებების, ფსიქოტროპული ნივთიერებების, პრეკურსორებისა და ნარკოლოგიური დახმარების შესახებ“ კანონში შესატანი ცვლილების განხილვისას, იურიდიულ საკითხთა კომიტეტის თავმჯდომარემ, ანრი ოხანაშვილმა განაცხადა, რომ კანონპროექტის სულისკვეთება არის ერთი მხრივ, საკონსტიტუციო სასამართლოს გადაწყვეტილებების გაგრძელება და მეორე მხრივ, ის, რომ ქმედების ადეკვატური უნდა იყოს სასჯელიც და პირის გაკიცხვაც.

„დოზების ამ ფორმით ჩამოყალიბებით მაქსიმალურად ბალანსდება ქმედების ადეკვატური სასჯელის გამოყენება, რაც რეალურად ნიშნავს პროპორციული და ადეკვატური სასჯელის გამოყენებას სამართლიანი თვალსაზრისით. დაბალანსებული და ადამიანზე მორგებული პოლიტიკის თვალსაზრისით წინ გადადგმული ნაბიჯია, არის საკითხები, რომელზეც გაგრძელდება მუშაობა“, - განაცხადა ანრი ოხანაშვილმა.

მისი თქმით, ასევე გათვალისწინებულია საექსპერტო საქმიანობის პრაქტიკაში მიღებული მეთოდოლოგიური და პროცედურული სპეციფიკა.

„ოდენობათა დაანგარიშების მეთოდი დაეყრდნო, ერთი მხრივ, სამეცნიერო ლიტერატურასა და მეორე მხრივ, ლაბორატორიული ექსპერტიზის პრაქტიკას, რაც გულისხმობს იმას, თუ როგორი სუბსტანციის ფორმით ხდება ქვეყანაში ნარკოტიკული საშუალებების არალეგალური ბრუნვიდან ამოღება და მათი ოდენობების გამოთვლა“ - განაცხადა ანრი ოხანაშვილმა.