მამუკა მდინარაძე ზაზა გახელაძეზე: ყველაფერს გავაკეთებთ, რომ ნებისმიერი უკანონო პატიმრობისგან ჩვენი მოქალაქეები მალე გამოვიხსნათ

ქართული სახელმწიფო ყველაფერს გააკეთებს იმისთვის, რომ ნებისმიერი ასეთი უკანონო პატიმრობისგან მალე გამოიხსნას ჩვენი მოქალაქეები, - ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ პარლამენტში, ოკუპანტების მიერ უკანონოდ დაკავებულ ზაზა გახელაძეზე საუბრისას განაცხადა.

„საქართველომ პირველად მიაღწია იმ იურიდიულ დოკუმენტამდე, რაც სტრასბურგის სასამართლომ დაგმო თავისი გადაწყვეტილების სახით, რომელიც სამართლებრივადაც უკვე საშუალებას იძლევა, რომ ჩვენი პრეტენზიები ოკუპანტი ქვეყნის მიმართ დასაბუთებულად, სამართლებრივი დასაბუთებით უფრო მძლავრი ბერკეტებით და ჩვენი საერთაშორისო პარტნიორებისა და მეგობრების ჩართულობით წარვადგინოთ.

თუმცა არის ძალიან ცუდი წერტილი, ხვრელი ამ ყველაფერში, რასაც ჰქვია ოკუპანტის ის თავაშვებული მოქმედება საოკუპაციო ხაზის იქით, რასაც ჩვენი მოქალაქეების, ადამიანის უფლებების დარღვევა, პატივისა და ღირსების შელახვა და უკანონო დაკავებები მოსდევს ხოლმე. ჩვენ ყოველთვის ყველაფერს ვაკეთებთ, რომ საერთაშორისო მექანიზმების ჩათვლით ამ წნეხისა და უბედურებისგან ჩვენი მოქალაქეები დავიცვათ. არის შემთხვევები, როდესაც ეს წნეხი ძალიან ჭირს იმ საოკუპაციო ბოროტი რეჟიმის გამო, რომელიც ჩვენი წინა ხელისუფლების მიერ მემკვიდრეობით გვხვდა. ქართული სახელმწიფო ყველაფერს გააკეთებს იმისთვის, რომ ნებისმიერი ასეთი უკანონო პატიმრობისგან მალე გამოიხსნას ჩვენი მოქალაქეები, თუმცა ეს არის ურთულესი თემა“, - განაცხადა მამუკა მდინარაძემ.

ოკუპირებული ცხინვალის „სასამართლომ“ ზაზა გახელაძეს 12 წლითა და 6 თვით პატიმრობა მიუსაჯა.

ადამიანის უფლებათა ევროპული სასამართლო დაეთანხმა საქართველოს მოთხოვნას, რომ რუსეთმა 2008 წლის აგვისტოს ომის დროს ადამიანის უფლებათა ევროპული კონვენციის არაერთი მუხლი დაარღვია.