ევროკავშირი: ძალზედ მნიშვნელოვანია, რომ საქართველოში ყველა პოლიტიკურმა პარტიამ ინსტიტუციონალურ ჩარჩოებში იმოქმედოს

COVID-19-ით განპირობებული გამოწვევების მიუხედავად, საქართველო ასოცირების ხელშეკრულების განხორციელების ერთგული რჩება, - ნათქვამია საქართველოს მიერ 2020 წლის განმავლობაში ასოცირების ხელშეკრულების განხორციელების შესახებ ევროკავშირის ყოველწლიურ ანგარიშში.

„ჩვენ ვაფასებთ საქართველოს მუდმივ პროგრესს რეფორმების კუთხით და ჩვენი ორმხრივი ურთიერთობებისა და აღმოსავლეთ პარტნიორობის მიმართ საქართველოს ერთგულებას. 2020 წლის საპარლამენტო არჩევნების შემდეგ, ძალზედ მნიშვნელოვანია, რომ ყველა პოლიტიკურმა პარტიამ ინსტიტუციონალურ ჩარჩოებში იმოქმედოს, რათა საერთო ენა და არსებული ვითარებადან გამოსვლის გზა იპოვონ. ეს საქართველოს პარლამენტს საშუალებას მისცემს, მტკიცე ზომები მიიღოს COVID-19-ის შემდეგ მდგრადი აღდგენისა და უფრო ფართო რეფორმების დღის წესრიგის წინ წასაწევად. ჩვენ ასევე კარგად ვთანამშრომლობთ ჩვენს ქართველ პარტნიორებთან ასოცირების შეთანხმების განახლებული დღის წესრიგის შეთანხმებაზე“, - განაცხადა უსაფრთხოებისა და საგარეო პოლიტიკის საკითხებში ევროკავშირის უმაღლესმა წარმომადგენელმა, ჟოზეპ ბორელმა.

ევროკავშირის ყოველწლიურ ანგარიშში აღნიშნულია, რომ საქართველო ასოცირების ხელშეკრულებით ნაკისრი ვალდებულებების ერთგული რჩება.

„ეფექტურად გაგრძელდა კანონმდებლობის ევროკავშირის სტანდარტებთან შესაბამისობაში მოყვანა. ამასთან, გამოწვევები კვლავ რჩება საარჩევნო რეფორმისა და სასამართლო სისტემის რეფორმის სფეროებში“, - აღნიშნულია ანგარიშში.

ანგარიშში ნათქვამია, რომ საჭიროა ინკლუზიური პოლიტიკური შეთანხმება უმრავლესობასა და ოპოზიციურ პარტიებს შორის, რათა შესაძლებელი გახდეს პარლამენტში მნიშვნელოვანი რეფორმების დღის წესრიგის შემუშავება.

„ზოგადად, ქართულ პოლიტიკასა და მედიაში პოლარიზაციის მოგვარება კვლავ პრიორიტეტად რჩება“, - აცხადებენ ევროკომისიაში.

ანგარიშში ასევე აღნიშნულია, რომ სასამართლოს დამოუკიდებლობისა და ანგარიშვალდებულების უზრუნველყოფა კვლავ მთავარ გამოწვევად რჩება.

ევროკავშირმა კვლავ დაადასტურა საქართველოს სუვერენიტეტისა და საერთაშორისოდ აღიარებულ საზღვრებში ტერიტორიული მთლიანობისადმი მხარდაჭერა.