გური სულთანიშვილი: „ნაცები“ და პატრიოტიზმი ისეთივე კონცეპტია, როგორც უკოფეინო ყავა ან უალკოჰოლო ლუდი

„ნაცები“ და პატრიოტიზმი ისეთივე კონცეპტია, როგორც უკოფეინო ყავა ან უალკოჰოლო ლუდი. აქედან არაფერი არ გამოვა, - განაცხადა ტელეკომპანია „იმედის“ გადაცემაში „იმედის ფაქტორი“ ანალიტიკოსმა, გური სულთანიშვილმა.

მისივე განცხადებით, „ნაციონალური მოძრაობის“ მცდელობა, გამოიყენონ პატრიოტიზმის იდეა მოსახლეობაზე ზემოქმედებისთვის, მარცხისთვისაა განწირული.

„ჩვენ გვახსოვს პასპორტის მონაცემებიდან მამის სახელის, ეროვნების ცნების ამოღება, რომელიც გულისხმობს იმ კონსერვატორული, ანდაც რეტროგრადიული პატრიოტიზმის საწინააღმდეგოს. ამას მოჰყვა მათი სეკულარიზმის ფორმები. მთელი იდეოლოგიური აპარატი მოწყობილი იყო იმაზე, რომ ქართული ტრადიციები მთლიანად გადაეხედათ, ირონიულად შეეხედათ მათთვის, აქედან გამომდინარე, ახლა მათი „დესამშობლოიზაცია“ და ახალი სამშობლოს დაბრუნების კონცეპტი იგივეა, რაც უალკოჰოლო ლუდი, უკოფეინო ყავა. ესაა სუროგატი იდეოლოგია. ერთია, რომ მათ არავინ დაუჯერებთ და მეორეა მათი ნებელობა. მათ ასეთი სურვილი არ ჰქონიათ. პირიქით. პატრიოტიზმის ტრადიციული გაგება, რომელსაც სუფრაზე მოვისმენთ, ასეთია: ქართველი არის სუფრა, ტრადიცია, რელიგია, წინაპრები. თუ შენ, რეფორმების დონეზე, მონაცემებიდან მამის სახელს, ანუ წინაპრების ხაზს ამოიღებ, რა გამოდის?.. მიშა ახლა ყოველდღე გვეუბნება, რომ ეკლესიები მან ააშენა და ქრისტიანობაც მან შემოიტანა საქართველოში, მაგრამ ჩვენ ვიცით რეალობა - ისინი ეკლესიებს ანგრევდნენ. ამიტომ, ძალიან უცნაურია ეს გარდასახვა. ესაა პოლიტიკური ინსტრუმენტი. მიშა ყოველ ჯერზე ცდილობს, რომ ჯვარი ამოიღოს. ფიქრობენ, რომ რაც არ უცდიათ, ის უნდა სცადონ. მათ ამის ინსტრუმენტის გამოყენება სურთ და „ნაციონალურ მოძრაობაში“ ვხედავთ ადამიანებს, რომლებიც, მაგალითად, „გირჩის“ წევრები იყვნენ და ახლა გველაპარაკებიან 3000-წლიან კულტურაზე, გულში მჯიღს იცემენ, ლამის სადღეგრძელოების დონეზე საუბრობენ და იქამდე, „გირჩის“ აქტივობებში იყვნენ ჩართულნი. ესაა საოცრება და ძალიან დიდი ცინიზმი საზოგადოების მიმართ. არ მგონია, რომ იმ პატრიოტიზმის იდეას, რომელსაც 9 წლის განმავლობაში ეომებოდი ხმალამოღებული, რამენაირად მიუბრუნდე. ეს ძალიან წაგებული თამაშია“ - აღნიშნა გური სულთანიშვილმა.