ლევან ბეჟაშვილი მიიჩნევს, რომ უკრაინის ელჩთან დაკავშირებით სააკაშვილის განცხადებები მტკიცებულებას მოკლებული არ იქნება

როდესაც ელჩი მთავარ პრობლემას ხედავს კერძო თანამდებობის პირის საჯარო განცხადებებში, ბუნებრივია, ეს ელჩის პრობლემაა, - ამის შესახებ „ნაციონალური მოძრაობის“ წევრმა ლევან ბეჟაშვილმა საქართველოში უკრაინის ელჩთან დაკავშირებით მიხეილ სააკაშვილის განცხადების კომენტირებისას აღნიშნა.

მისივე თქმით, ელჩი, როგორც სახელმწიფოს წარმომადგენელი, უნდა ზრუნავდეს თავისი მოქალაქეების უფლებების დაცვასა და ამ შემთხვევაში ბეჟაშვილის თქმით, უკანონოდ თავისუფლება აღკვეთილი მეზღვაურების საქმეებზე.

„ორ ქვეყანას შორის ურთიერთობებში დღეს მთავარი პრობლემა არის უკანონოდ დაკავებული უკრაინელი მეზღვაურები, არც სასამართლო გადაწყვეტილება არსებობს, არც მტკიცებუულებები და „ქართული ოცნების“ ხელისუფლებას უკანოდ ჰყავთ მძევლად აყვანილი. როდესაც ელჩი მთავარ პრობლემას ხედავს კერძო თანამდებობის პირის საჯარო განცხადებებში, ბუნებრივია, ეს არის ელჩის პრობლემა, რადგან ზოგადად, ელჩი, როგორც სახელმწიფოს წარმომადგენელი, უნდა ზრუნავდეს თავისი მოქალაქეების უფლებების დაცვაზე, ამ შემთხვევაში უკანონოდ თავისუფლება აღკვეთილი მეეზღვაურების საქმეებზე. ამიტომ, მთავარი განმსაზღვრელი უკრაინაში მიხეილ სააკაშვილის სტატუსთან და განცხადებებთან მიმართებაში არის პრეზიდენტ ზელენსკის, მთავრობის მხარდაჭერა და რაც მთავარია, უკრაინელი ხალხის მხარდაჭერა“, - განაცხადა ლევან ბეჟაშვილმა.

ბეჟაშვილის თქმით, მიხეილ სააკაშვილი უკრაინის სახელმწიფოსათვის ძალიან მნიშვნელოვან რეფორმებს ახორციელებს.

„ამიტომ მთავარი მხარდაჭერა მას გარანტირებული აქვს და ბუნებრივია, ელჩმა უნდა იცოდეს, რომ ამ შემთხვევაში ორ ქვეყანას შორის ურთიერთოებების გამწვავების პრობლემა არის არა კონკრეტულ რაიმე საჯარო განცხადებებში, არამედ მეზღვაურების უკანონო დაკავების ფაქტში, რომელსაც დღესაც „ქართული ოცნების“ ხელისუფლება მანიპულირებისთვის იყენებს“, - აღნიშნა ლევან ბეჟაშვილმა.

რაც შეეხება კითხვას, „თქვენ საუბრობთ ელჩის განცხადებებზე, მაგრამ არ საუბრობთ სააკაშვილის შეფასებებზე - „მექრთამე“, „ღრმად კორუმპირებული“, რამდენად სწორია ასეთი შეფასებები დიპლომატის მისამართით?“, - ბეჟაშვილი პასუხობს, რომ სააკაშვილის განცხადებები საფუძველს და არც კონკრეტულ მტკიცებულებას არ იქნება მოკლებული.

„მიხეილ საააკაშვილი არის საჯარო მოღვაწე, თანამდებობის პირი უკრაინის აღმასრულებელ ხელისუფლებაში, ამიტომ მის მიერ გაკეთებული კონკრეტული განცხადებები, ბუნებრივია, არ იქნება არც საფუძველს და არც კონკრეტულ მტკიცებულებას მოკლებული, ამიტომ ის აკეთებს მისი მთავრობის და პრეზიდენტის ლეგიტიმაციიდან გამოწვეულ შესაბამის განცხადებას. ამ შემთხვევაში მთავარი არის უკრაინასა და საქართველოს შორის არსებული უკვე ღრმა პრობლემა, რომელიც მეზღვაურების უკანონოდ დაკავების ფაქტს ეხება.

კობახიძეზე, მდინარაძეზე, გახარიაზე ჩვენ ვამბობთ ღრმად კორუმპირებულები, მექრთამეებიო და მტკიცებულებებით ვამაგრებთ ხოლმე, ბუნებრივია, პოლიტიკოსებისაგან, რომლებსაც აქვთ კონკრეტული მტკიცებულებები ამ საკითხთან დაკავშირებით, ეს განცხადებები მისაღებია, ჩვეულებრივი პოლიტიკური დღის წესრიგია. ამიტომ მიხეილ სააკაშვილსაც აქვს საფუძვლები, გააკეთოს ეს განცხადებები, მით უფრო, როდესაც ელჩი არ ასრულებს თავის კონკრეტულ მოვალეობას, არ იცავს უკანონოდ დაკავებული მეზღვაურების უფლებებს და სხვა პრობლემას ხედავს რომელიმე თანამდებობის პირის საჯარო განცხადებებში“, - განაცხადა ლევან ბეჟაშვილმა.

საქართველოს ყოფილმა პრეზიდენტმა, უკრაინის რეფორმების საბჭოს აღმასრულებელი კომიტეტის თავმჯდომარემ მიხეილ სააკაშვილმა, საქართველოში უკრაინის ელჩ იგორ დოლგოვს კორუმპირებული უწოდა.

იგორ დოლგოვმა კომეტარი გააკეთა საქართველოს ყოფილი პრეზიდენტის, უკრაინის რეფორმების საბჭოს აღმასრულებელი კომიტეტის თავმჯდომარის, მიხეილ სააკაშვილის განცხდებაზე, რომ დაუმორჩილებლობის აქციები დიდი მასშტაბით არის გასაკეთებელი.

უკრაინის საგარეო საქმეთა სამინისტრომ დღეს განცხადება გაავრცელა და მიხეილ სააკაშვილს მოუწოდა, რომ თავი შეიკავოს საქართველოში დაუმორჩილებლობის აქციებისკენ მოწოდებებისგან.