ნიკოლოზ სამხარაძე: „ნაციონალურ მოძრაობას“ ნიკა მელიას საქმე შესაძლოა, საკუთარი თავის მსხვერპლად წარმოსაჩენად აწყობდეს

„ნაციონალურ მოძრაობას“ ნიკა მელიას საქმე შესაძლოა, საკუთარი თავის მსხვერპლად წარმოსაჩენად აწყობდეს, – ამის შესახებ პარლამენტის საგარეო ურთიერთობათა კომიტეტის თავმჯდომარემ, ნიკოლოზ სამხარაძემ განაცხადა.

„ნიკა მელიას საქმე წმინდად სამართლებრივი საკითხია იქიდან გამომდინარე, რომ კანონით გაწერილია პროცედურები, რა უნდა გაიაროს როგორც პროკურატურამ, ასევე ნიკა მელიამ. რაც შეეხება მამუკა მდინარაძის ბრიფინგს, ის განპირობებული იყო იქედან გამომდინარე, რომ მელიას განცხადებაში ნათქვამი იყო, თითქოს, „ქართული ოცნება“ გირაოს გადახდას აპირებს, რაც სრული აბსურდია.

„ნაციონალურ მოძრაობას“ ნიკა მელიას საქმე შეიძლება აწყობდეს საკუთარი თავის მსხვერპლად წარმოჩინებისა და ასევე იმისთვის, რომ საერთაშორისო პარტნიორები დააჯერონ, საქართველოში ოპოზიციის ლიდერებს დაუსაბუთებელი ბრალდებით დევნიან. ეს არის მათი მთავარი გეგმა და ამოცანა, თუმცა მეორეა სამართლებრივი საკითხი. ნიკა მელიას აქვს თავისუფლება და მშვენიერი შესაძლებლობა იმის, რომ მომავალი კვირიდან არ წავიდეს ციხეში“, – განაცხადა ნიკოლოზ სამხარაძემ.

„ნაციონალური მოძრაობის“ თავმჯდომარეს, ნიკა მელიას გირაოს დარჩენილი თანხის გადახდის ვადა დღეს ეწურება.

ფრაქცია „ქართული ოცნების“ თავმჯდომარემ, მამუკა მდინარაძემ განაცხადა: თუ ნიკა მელიას გირაოს გადახდა უნდა, დაექვემდებაროს კანონს და არა მიხეილ სააკაშვილის სურვილებს. მან ასევე აღნიშნა, რომ „სასაცილოა ნიკა მელიას და „ნაციონალური მოძრაობის“ ლიდერების სპექტაკლი, თითქოს გავრბივართ, რომ ვიღაც ადამიანი ვიპოვოთ, ვინც გირაოს თანხას შეიტანს“

„პოლიტიკურად მოტივირებული საქმის გირაოს გადახდას არ ვაპირებ“, - ამის შესახებ „ნაციონალური მოძრაობის“ თავმჯდომარემ, ნიკა მელიამ პარტიის ოფისში გამართულ ბრიფინგზე განაცხადა და ასევე აღნიშნა, რომ ვრცელდება ხმები, თითქოს თანხის გადახდას „მითიური მოქალაქე“ აპირებს.

5 თებერვალს, საქართველოს გენერალურმა პროკურატურამ განაცხადა, რომ თუ ნიკა მელია გირაოს არ გადაიხდის, პროკურატურა სასამართლოს მისთვის აღკვეთის ღონისძიების სახით პატიმრობის შეფარდების შუამდგომლობით მიმართავს.