კახა კუკავა: დღევანდელ შეხვედრაზე „გირჩი“ „დაბოლილი“ იყო

დღევანდელ შეხვედრაზე „გირჩი“ „დაბოლილი“ იყო, ამიტომაც ვერ გაგცემთ პასუხს იმის შესახებ, რა განცხადებებიც გარეთ გააკეთეს, - განაცხადა „თავისუფალი საქართველოს“ ლიდერმა, კახა კუკავამ ოპოზიციის შეხვედრის დასრულების შემდეგ.

ჟურნალისტის კითხვაზე, ნამდვილად თქვა თუ არა, რომ მისთვის „მიშას თამაში“ ეცდიათ, კუკავამ განაცხადა:

„არა, რა თქმა უნდა. მე, საერთოდ, ეჭვი მეპარება, რომ გაიგეს, რაზე იყო შიგნით საუბარი“, - განაცხადა კახა კუკავამ.

იქამდე, „გირჩმა“ ოპოზიციის გაერთიანებული შეხვედრა ნაადრევად დატოვა, რის შემდეგაც, პარტიის ერთ-ერთმა ლიდერმა, იაგო ხვიჩიამ განაცხადა: „ფაქტობრივად ხალხმა, რომელიც „ლეიბორისტული პარტიის“ ოფისშია, ერთხმად დაგვიდასტურა, რომ ისინი მიშას თამაშს თამაშობენ. მაგალითად, კახა კუკავამ მითხრა, გვაცალეთ, მიშას თამაშის თამაში. ზოგადად, განწყობაც ეს იყო, სადაც აღვნიშნეთ, რომ მიშას თამაშში ჩვენი ადგილი არ არის“.

დღეს ოპოზიციური პარტიების წარმომადგენლები „ლეიბორისტული პარტიის“ ოფისში შეიკრიბნენ. პოლიტიკოსები „ნაციონალური მოძრობის“ თავმჯდომარის, ნიკა მელიას დაპატიმრების შემთხვევაში მოქმედების გეგმაზე მსჯელობდნენ.