კახა კუკავა: 110/40-ზე არის ის ნიშნული, რომელზეც შესაძლებელია კომპრომისი შედგეს

110/40-ზე არის კომპრომისული წინადადება, იმასთან შედარებით, რაც აქამდე იყო გაჟღერებული. ეს შეიძლება აღებული იყოს, როგორც პირველი მოსმენის ვარიანტი და მესამე მოსმენამდე კიდევ შეიძლება შევიდეს კორექტივები. ამას შეიძლება დაეფუძნოს პოლიტიკური შეთანხმება, - ამის შესახებ გადაცემაში „დღის ქრონიკა“ პარტია „თავისუფალი საქართველოს“ ლიდერმა კახა კუკავამ განაცხადა.

მისი თქმით, „თავისუფალი საქართველო“ რამდენიმე თვეა ამბობს, რომ შეთანხმება და კომპრომისი აუცილებელია.

„ჩვენ, „თავისუფალი საქართველო“, განსხვავებით ხელისუფლებისა და ოპოზიციისგან, რამდენიმე თვეა ვაცხადებთ, რომ შეთანხმება და კომპრომისი არის აუცილებელი. „ოცნება“ და „ნაციონალები“ ამაში ჰგვანან ერთმანეთს, შეთანხმება ჰგონიათ ცუდი სიტყვა, დათმობა ჰგონიათ ცუდი სიტყვა. კომპრომისი ესირცხვილებათ. ჩვენ პირიქით, ვფიქრობთ რომ კომპრომისი, ორივე მხრიდან დათმობები არის ის, რაც ჩვენს ქვეყანას სჭირდება და 110/40-ზე არის ის ნიშნული, რომელზეც შესაძლებელია ეს კომპრომისი შედგეს", - განაცხადა კუკავამ.

მისი თქმით, ამ შემოთავაზების პირობებშიც კი, პარტია, რომელიც არჩევნებში უმრავლესობით გავა, შეძლებს ერთპიროვნულად დააკომპლექტოს მთავრობა.

„40%-იანი ჩამკეტი არ არსებობს. ეს ფარსია, რადგან დაარეგისტრირებენ პარტიას, ვიცი კიდეც რას არქმევენ, „ქართული ოცნება მომავლისათვის“, მისი თავმჯდომარე იქნება კახა ოქრიაშვილი, რომელიც 42 ნომრით იყრის კენჭს და აიღებს დამატებით მაჟორიტარულ ოლქებში მანდატებს. და შემდეგ „ქართული ოცნება“ შექმნის კოალიციას. არ მინდა, რომ კომპრომისი თავიდანვე ფარსზე დავაფუძნოთ“, - განაცხადა კუკავამ.

1-ელ მარტს „ქართული ოცნების“ ოფისში უმრავლესობის სხდომა პარტიის ლიდერის, ბიძინა ივანიშვილის ხელმძღვანელობით ჩატარდა, რომლის შემდეგ პარლამენტის თავმჯდომარემ, არჩილ თალაკვაძემ განაცხადა, რომ მმართველმა გუნდმა ოპოზიციას საარჩევნო სისტემასთან დაკავშირებით სამართლიანი და პრაგმატული პირობები შესთავაზა, თუმცა დეტალებზე არ უსაუბრია.

ბოლო კვირის განმავლობაში მმართველმა გუნდმა და ოპოზიციამ ევროკავშირის ელჩთანდა გერმანიის საელჩოში შეხვედრები გამართეს. 25 თებერვალს კი საქართველოში აშშ-ის ელჩის მოადგილემ, ელიზაბეთ რუდმა ხელისუფლებისა და ოპოზიციის წარმომადგენლებს ვახშამზე უმასპინძლა. შეხვედრას ასევე ესწრებოდნენ ევროკავშირის ელჩი კარლ ჰარცელი და გერმანიის ელჩი ჰუბერტ ქნირში.