ამირან გულუაშვილი: ერთადერთი საკანონმდებლო ალტერნატივა, რომელიც ნიკა მელიას საქმესთან დაკავშირებით შეიძლება ჩაითვალოს უფრო მკაცრ აღკვეთის ღონისძიებად, არის პატიმრობა

ერთადერთი საკანონმდებლო ალტერნატივა, რომელიც ნიკა მელიას საქმესთან დაკავშირებით შეიძლება ჩაითვალოს უფრო მკაცრ აღკვეთის ღონისძიებად, არის პატიმრობა, – ამის შესახებ პროკურორმა, ამირან გულუაშვილმა პარლამენტის საპროცედურო საკითხთა კომიტეტის სხდომაზე განაცხადა, სადაც ნიკა მელიასთვის სადეპუტატო უფლებამოსილების შეწყვეტის საკითხს განიხილავენ.

მისი თქმით, 2020 წლის პირველ ნოემბერს, ნიკა მელიამ საჯაროდ გამოსვლისას დემონსტრაციულად დაარღვია გირაოს გამოყენების პირობა, რამაც წარმოშვა პროკურორის ვალდებულება უფრო მკაცრი აღკვეთის ღონისძიების გამოყენების მოთხოვნით სასამართლოსთვის მიმართვის თაობაზე.

„კონკრეტულ შემთხვევაში მოთხოვნილი იყო გამოყენებული გირაოს ოდენობის გაზრდა. მიუხედავად ამისა, უფრო მკაცრმა აღკვეთის ღონისძიებამ, რომლის მიზანი იყო ბრალდებულს დაეცვა საქართველოს კანონმდებლობის და სასამართლოს გადაწყვეტილებების მოთხოვნები ვერ უზრუნველყო, ვერ უზრუნველყო აღკვეთის ღონისძიების მიზნები. ბრალდებულმა ნიკანორ მელიამ საჯაროდ უარი განაცხადა გირაოს გადახდაზე. ამ ვითარებაში გირაოს შემდგომი გამოყენება ყოველგვარ სამართლებრივ საფუძველს მოკლებულია.

გამკაცრებული აღკვეთის ღონისძიების პირობა ნიკა მელიას მიერ არ შესრულდა. ნიკანორ მელიამ გამიზნულად არ უზრუნველყო სასამართლოს მიერ გირაოს შეფარდებული ფულადი თანხის შესაბამის ანგარიშზე შეტანა და არც მისი უძრავი ქონებით უზრუნველყოფა, ხაზგასმით აღსანიშნავია, რომ ნიკა მელია საკუთრებაში აქვს უძრავი ქონება, რომელიც საკმარისია გირაოს უზრუნველსაყოფად. ასევე მის მიერვე 2020 წლის 31 დეკემბერს შევსებული დეკლარაციის თანახმად, ამავე წლის დეკემბერში გააჩნდა საკმარისი თანხა გირაოს გადასახდელად“, – განაცხადა ამირან გულუაშვილმა.

მან ასევე აღნიშნა, რომ სასამართლოსათვის გირაოს კიდევ უფრო გაზრდილი ოდენობით მიმართვა ყოველგვარ საფუძველს მოკლებულია.

„იმ დროს, როდესაც საქართველოს სისხლის სამართლის საპროცესო კოდექსის მე-200 მუხლის მეხუთე ნაწილი განსაზღვრავს უფრო მკაცრი აღკვეთის ღონისძიების გამოყენების აუცილებლად, მნიშვნელოვანია, განისაზღვროს უფრო მკაცრი აღკვეთის ღონისძიება, რომელიც გირაოსგან განსხვავებით შეძლებს უზრუნველყოს ნიკანორ მელიას სათანადო ქცევა. სასამართლოსთვის გირაოს კიდევ უფრო გაზრდილი ოდენობით მიმართვა ყოველგვარ სამართლებრივ საფუძველს მოკლებულია. გირაოს გაზრდილი ოდენობის გადახდაზე უარის თქმა ბუნებრივად აჩენს მოლოდინს, რომ გირაოს კიდევ უფრო გაზრდილი ოდენობის გამოყენება ვერ ჩაითვლება ადეკვატურ ლოგიკურ და პროპორციულ ღონისძიებად. შესაბამისად, ერთადერთი საკანონმდებლო ალტერნატივა, რომელიც მოცემულ შემთხვევაში შეიძლება ჩაითვალოს უფრო მკაცრ აღკვეთის ღონისძიებად, არის პატიმრობა“, – განაცხადა პროკურორმა.

გენერალურმა პროკურატურამ ნიკა მელიასთვის აღკვეთის ღონისძიებად პატიმრობის გამოყენებასთან დაკავშირებით პარლამენტს მიმართა. მელიასთვის სადეპუტატო უფლებამოსილების შეჩერების საკითხი დღევანდელ სესიაზე გადის.

„ჯგუფური ძალადობის ხელმძღვანელობის და მასში მონაწილეობისთვის“ სისხლის სამართლის პასუხისგებაში მიცემულ ნიკა მელიას თბილისის საქალაქო სასამართლომ 2019 წლის 27 ივნისს აღკვეთის ღონისძიების სახით შეუფარდა 30 000-ლარიანი გირაო და დამატებით შემზღუდავი ღონისძიებები, მათ შორის, ელექტრონული მონიტორინგი. თუმცა, 2020 წლის პირველ ნოემბერს, საზოგადოებრივი თავშეყრის ადგილას საჯარო განცხადების გაკეთებისას, ნიკა მელიამ ელექტრონული მონიტორინგისთვის განკუთვნილი სამაჯური მოიხსნა.