ხატია დეკანოიძე: ვერცერთ შემთხვევში, ვერ გაბედავთ ნიკა მელიას დაკავებას

გულწრფელად მინდა გითხრათ და პირველ რიგში მივმართო „ქართული ოცნების“, უფრო სწორად გავრილოვის ყველა იმ მსახურს, რომელიც ახლა პარლამენტის შენობაში არის შეკრებილი და საკუთარ თავს უწოდებს საქართველოს მოქალაქეების წარმომადგენელს, აი მათ მინდა ზუსტად მივმართო, ვერცერთ შემთხვევში, ვერ გაბედავთ და ვერ დააკავებთ ნიკა მელიას. გასაგებია, რომ ისინი ასრულებენ გავრილოვის მითითებებს და სამარცხვინოა ეს ყველაფერი, როდესაც საქართველოს ყველაზე უფრო მნიშვნელოვან, დამოუკიდებლობის სიმბოლოში, საქართველოს პარლამენტში სხედან ადამიანები რომლებიც ასრულებენ ოკუპანტი, კერძოდ გავრილოვის, პუტინის, ლავროვის და ა.შ მითითებებს, რომ დააკავონ და დასაჯონ ოპოზიციური პარტიის ლიდერი, - ამის შესახებ „ნაციონალური მოძრაობის“ წევრმა, ხატია დეკანოიძემ განაცხადა.

„მე სრული პასუხისმგებლობით ვაცხადებ, მე და ჩემი მეგობრები, ყველა ის ადამიანი, ვინც 20 ივნისს აპროტესტებდა გავრილოვის ჩამობრძანებას და ჩამოსკუპებას საქართველოს პარლამენტის სპიკერის სავარძელში, ყველა ის ადამიანი ვინც იბრძვის თავისუფლებისთვის, ვაცხადებთ ღიად, გულწრფელად რომ არ არსებობს მექანიზმი რითიც შეძლებენ ნიკა მელიას წინააღმდეგ აღასრულონ ის მახინჯი კანონი, მახინჯი მართლმსაჯულების ფორმებით, რომელიც დღეს საქართველოში არსებობს. დიახ, ეს არის გავრილოვის დავალება. დიახ, სულ ტყუილად არ უხდიდა იგი მადლობას გუშინ „ქართული ოცნების“ ე.წ. დეპუტატებს. დიახ, ეს არის რუსეთის დავალება დასაჯონ საქართველოს მოქალაქეები იმიტომ, რომ შემდეგ არც ერთმა მოქალაქემ აღარ გაბედოს პროტესტი რუსების წინააღმდეგ. სწორედ ამიტომ ამბობდა იგი, რომ საქართველოს ხელისუფლებამ აღკვეთა გადატრიალების მცდელობა. ორად ორი ძალა არსებობს ვინც 20 ივნისს უწოდებს გადატრიალების მცდელობას, პირველი ეს არის გავრილოვი, ანუ რუსეთი და კრემლი და მეორე ეს არის „ქართული ოცნება“. ამიტომ, დიახ, სრული სოლიდარობა, მათ შორის არამხოლოდ ჩემი, არამედ ჩემი მეგობრების, ვინც აპროტესტებდა 20 ივნისს. მე დარწმუნებული ვარ, რომ „ქართული ოცნება“ არათუ გაბედავს, ვერ აღასრულებს მახინჯ კანონს მის წინააღმდეგ რომელიც არის უშუალო დავალება გავრილოვის“, - განაცხადა ხატია დეკანოიძემ.

მისი თქმით, ნიკა მელიას დაპატიმრების შემთხვევაში, სამართალდამცველებს ყველა მისი თანამებრძოლის დაკავება მოუწევთ.

„იცით რა, მე სიმართლეს გეტყვით რომ პოლიტიკური დაუმორჩილებლობის აქტი, მათ შორის ის აქტი, რა ნაბიჯიც ახლა გადადგა ნიკა მელიამ, არის ძალიან მნიშვნელოვანი იმის გასათვიცნობიერებლად, რომ ამ ქვეყანაში არ არსებობს სამართალი, არ არსებობს სასამართლო და ის, რომ ჩინჩალაძე- მურუსიძის სასამართლო, შოთაძე-ფარცხალაძის პროკურატურა, გავრილოვის პარლამენტი, ის რომ მთელი „ქართული ოცნება“, რომელმაც მიიტაცა სახელმწიფო, ვერ შეძლებს აღასრულოს მახინჯი კანონი, იმ ფორმით რომლითაც მათ სურთ. რაც შეეხება რა ხერხით, ნიკამ ამაზე ძალიან კარგად ისაუბრა, იგი არ აპირებს დაემორჩილოს „ქართული ოცნების“ და გავრილოვის გადაწყვეტილებას და ჩვენ არ ვაპირებთ გავრილოვს გავატანოთ ჩვენი მეგობარი, ჩვენი თანამებრძოლი. რავიცი მე ახლა ვუთხარი „ქართული ოცნებას“ ღიად მივმართავ კიდევ ერთხელ, რომ თუ გადაწყვეტენ რაიმე სახით აღასრულონ კანონი, რა თქმა უნდა, კანონის მახინჯი ფორმებით აღსრულება მოუწევთ ყველა ჩვენგანის მიმართ“, - განაცხადა ხატია დეკანოიძემ.

ნიკა მელიასთან დაკავშირებით, პროკურატურის შუამდგომლობას აღკვეთის ღონისძიებად პატიმრობის გამოყენებასთან დაკავშირებით, პარლამენტის კომიტეტებმა მხარი დაუჭირეს.

გენერალურმა პროკურატურამ ნიკა მელიასთვის აღკვეთის ღონისძიებად პატიმრობის გამოყენებასთან დაკავშირებით პარლამენტს მიმართა. მელიასთვის სადეპუტატო უფლებამოსილების შეჩერების საკითხი დღევანდელ სესიაზე გადის.

„ჯგუფური ძალადობის ხელმძღვანელობის და მასში მონაწილეობისთვის“ სისხლის სამართლის პასუხისგებაში მიცემულ ნიკა მელიას თბილისის საქალაქო სასამართლომ 2019 წლის 27 ივნისს აღკვეთის ღონისძიების სახით შეუფარდა 30 000-ლარიანი გირაო და დამატებით შემზღუდავი ღონისძიებები, მათ შორის, ელექტრონული მონიტორინგი. თუმცა, 2020 წლის პირველ ნოემბერს, საზოგადოებრივი თავშეყრის ადგილას საჯარო განცხადების გაკეთებისას, ნიკა მელიამ ელექტრონული მონიტორინგისთვის განკუთვნილი სამაჯური მოიხსნა.