ლევან იოსელიანი: „ქართული ოცნება“ პროცესების იმდაგვარ რადიკალიზაციას ახდენს, რომ მთლიანად ჩიხში შეჰყავს

რატომ უნდა მოვუხსნათ ნიკა მელიას იმუნიტეტი, როდესაც ერთი კვირის წინ ჩვენ თვითონ შევუნარჩუნეთ, - ამის შესახებ პარტია „მოქალაქეების“ წევრმა ლევან იოსელიანმა განაცხადა.

„ვერ მოვისმინე ვერცერთი არგუმენტი რატომ უნდა მოეხსნას ნიკა მელიას პარლამენტის იმუნიტეტი, როდესაც ერთი კვირის წინ, ჩვენ თვითონ შევუნარჩუნეთ და ვთქვით, რომ ეს იყო განპირობებული იმ პოლიტიკური მიზანშეწონვით, რაც ქვეყანაში არსებობს. მას არ მოუხდენია არც მოწმეებზე ზეწოლა, არ ჰქონია მცდელობა მიმალვოდა გამოძიებას, არ ჰქონია მცდელობა გაენადგურებინა მტკიცებულებები. პარლამენტმა ეს ყველაფერი უნდა გაიაზროს“, - განაცხადა ლევან იოსელიანმა.

მელიას საკითხზე საკითხზე პარლამენტის ოპოზიციონერმა ვიცე-სპიკერმა, პარლამენტის პლენარულ სხდომაზეც ისაუბრა. იოსელიანმა „ქართულ ოცნებას“ მოუწოდა, კარგად გაიაზრონ პარლამენტის როლი და არ იქცნენ პროკურატურის გაგრძელებად.

„ქართული ოცნება“ პროცესების იმდაგვარ რადიკალიზაციას ახდენს, რომ მთლიანად ჩიხში შეგყავთ - აღარ აპირებთ დიალოგის გაგრძელებას?! აღარ გინდათ, ოპოზიცია შემოვიდეს პარლამენტში?! დღეს გენერალური პროკურატურის წარმომადგენელს დავუსვი კითხვა იმის შესახებ, არის თუ არა დანაშაული გირაოს არგადახდა. მითხრეს, რომ როგორც იურისტმა უნდა ვიცოდე, რომ ეს არ არის ცალკე აღებული დანაშაული. კი, გირაოს არგადახდა, დანაშაული არ არის! გირაოს არგადახდის გამო პარლამენტმა არ უნდა გასცეს თანხმობა იმაზე, რომ ადამიანი საპატიმროში მოხვდეს. დეპუტატის იმუნიტეტის არსი არის ის, რომ დაცული იყო ჩვენი გამოხატვის თავისუფლება და დაცული იყოს ის პოლიტიკური რისკი, რასაც კონკრეტულ შემთხვევაში ჩვენ, პოლიტიკოსები ვიღებთ. ჩათვალეთ, რომ არგადახდა არის ნიკა მელიას პოლიტიკური პროტესტის გამოხატვის ფორმა. თუკი პოლიტიკური პროტესტის გამოხატვის ფორმა იმუნიტეტით არის დაცული, მაშინ იმუნიტეტს რატომ ვუხსნით?! ორი წლის განმავლობაში არ ჰქონია მცდელობა, რომ ზეწოლა მოეხდინა მოწმეებზე, მტკიცებულებების განადგურებას ეცადა ან შეეცადა მიმალვას. როცა არ არსებობს იმის წინაპირობა, რომ მის მიმართ პატიმრობა იყოს გამოყენებული, სასამართლომ ამაზე თავიდანვე თქვა უარი. ჩვენ რატომ ვქმნით ამის წინაპირობას და რატომ ვაძლევთ მწვანე შუქს იმას, რომ მელია საპატიმროში მოხვდეს? ხომ არ შეიძლება პარლამენტი პროკურატურის გაგრძელება იყოს?! ხომ შეუძლია პარლამენტს თქვას „არა“ და საქმის არსებით განხილვას დაელოდოს“, - განაცხადა ლევან იოსელიანმა.

ცნობისათვის, სოზარ სუბარის განცხადებით, მმართველ გუნდს აქვს ინფორმაცია, რომ „სადეპუტატო იმუნიტეტის შეჩერების შემდეგ, თუკი სასამართლო აღკვეთის ღონისძიების გამკაცრების თაობაზე პროკურატურის შუამდგომლობას დააკმაყოფილებს, ნიკა მელია „ნაციონალური მოძრაობის“ ოფისში ჩაკეტვას და წინ სხვა ადამიანების აფარებას აპირებს“.

ნიკა მელიასთან დაკავშირებით, პროკურატურის შუამდგომლობას აღკვეთის ღონისძიებად პატიმრობის გამოყენებასთან დაკავშირებით, პარლამენტის კომიტეტებმა მხარი დაუჭირეს.

გენერალურმა პროკურატურამ ნიკა მელიასთვის აღკვეთის ღონისძიებად პატიმრობის გამოყენებასთან დაკავშირებით პარლამენტს მიმართა. მელიასთვის სადეპუტატო უფლებამოსილების შეჩერების საკითხი დღევანდელ სესიაზე გადის.

„ჯგუფური ძალადობის ხელმძღვანელობის და მასში მონაწილეობისთვის“ სისხლის სამართლის პასუხისგებაში მიცემულ ნიკა მელიას თბილისის საქალაქო სასამართლომ 2019 წლის 27 ივნისს აღკვეთის ღონისძიების სახით შეუფარდა 30 000-ლარიანი გირაო და დამატებით შემზღუდავი ღონისძიებები, მათ შორის, ელექტრონული მონიტორინგი. თუმცა, 2020 წლის პირველ ნოემბერს, საზოგადოებრივი თავშეყრის ადგილას საჯარო განცხადების გაკეთებისას, ნიკა მელიამ ელექტრონული მონიტორინგისთვის განკუთვნილი სამაჯური მოიხსნა.