გიორგი ვოლსკი: სახელმწიფო არ შეიძლება იმართებოდეს „ფანჩატურში“ დადგენილი წესებით და დღის წესრიგით

არ შეიძლება სახელმწიფო იმართებოდეს ქაოსით და „ფანჩატურში“ დადგენილი წესებით და დღის წესრიგით. ესაა ის რეალობა რომელსაც ჩვენ ვუპირისპირდებით, - ამის შესახებ საპარლამენტო უმრავლესობის ერთ-ერთმა ლიდერმა გიორგი ვოლსკიმ პარლამენტში სიტყვით გამოსვლისას განაცხადა.

„მოცემული რეალობა დამატებითი შეკითხვის დასმის წინაპირობას არ ქმნის, საზოგადოების ერთ ნაწილს მიაჩნია, რომ ჩვენი ქვეყანა უნდა იმართებოდეს სახელმწიფო კანონებით, არსებობს სახელმწიფო სტრუქტურები, ზოგს მოსწონს, ზოგს არა. რა პერიოდიც არ უნდა ავიღოთ იწერებოდა კანონები და ამ კანონების მიხედვით ცხოვრობდა ქვეყანა და არ იმ კანონების მიხედვით, რომლებსაც გვკარნახობენ. არის თუ არა თვალსაჩინო დარღვევა, რომელსაც განაპირობებს პროკურატურის მოთხოვნა, რომელზეც იმსჯელებს მხოლოდ სასამართლო. ვალდებულია თუ არა პარლამენტი, მისცეს სასამართლოს ეს შესაძლებლობა და ადვოკატები და ბრალდებულები ერთმანეთს დაუპირისპირდნენ. რასაკვირველია, ვალდებულია წინააღმდეგ შემთხვევში ვერ შედგება სახელმწიფო“, - აღნიშნა ვოლსკიმ.

გიორგი ვოლსკის განცხადებით, დღეს საზოგადოებას წარმოადგენს ის გუნდი, რომელიც ამ გადაწყვწტილებას ემხრობა. „არცერთი ჩვენგანი არაა ემოციისგან დაცლილი ადამიანი. ვის აწყობს ეს განცხადება და სავარძელში ჩახტომა, ვისი დაკვეთით და ინტერესით შეიძლება მოქმედებდეს ესა თუ ის ადამიანი, რომელიც ოკუპანტი სახელმწიფოს ძალას წარმოადგენს. აქაც შეკითხვები ზედმეტია“,- აღნიშნა ვოლსკიმ.

ცნობისათვის, სოზარ სუბარის განცხადებით, მმართველ გუნდს აქვს ინფორმაცია, რომ „სადეპუტატო იმუნიტეტის შეჩერების შემდეგ, თუკი სასამართლო აღკვეთის ღონისძიების გამკაცრების თაობაზე პროკურატურის შუამდგომლობას დააკმაყოფილებს, ნიკა მელია „ნაციონალური მოძრაობის“ ოფისში ჩაკეტვას და წინ სხვა ადამიანების აფარებას აპირებს“.

ნიკა მელიასთან დაკავშირებით, პროკურატურის შუამდგომლობას აღკვეთის ღონისძიებად პატიმრობის გამოყენებასთან დაკავშირებით, პარლამენტის კომიტეტებმა მხარი დაუჭირეს.

გენერალურმა პროკურატურამ ნიკა მელიასთვის აღკვეთის ღონისძიებად პატიმრობის გამოყენებასთან დაკავშირებით პარლამენტს მიმართა. მელიასთვის სადეპუტატო უფლებამოსილების შეჩერების საკითხი დღევანდელ სესიაზე გადის.

„ჯგუფური ძალადობის ხელმძღვანელობის და მასში მონაწილეობისთვის“ სისხლის სამართლის პასუხისგებაში მიცემულ ნიკა მელიას თბილისის საქალაქო სასამართლომ 2019 წლის 27 ივნისს აღკვეთის ღონისძიების სახით შეუფარდა 30 000-ლარიანი გირაო და დამატებით შემზღუდავი ღონისძიებები, მათ შორის, ელექტრონული მონიტორინგი. თუმცა, 2020 წლის პირველ ნოემბერს, საზოგადოებრივი თავშეყრის ადგილას საჯარო განცხადების გაკეთებისას, ნიკა მელიამ ელექტრონული მონიტორინგისთვის განკუთვნილი სამაჯური მოიხსნა.